परिचय
बागलुङ जिल्लाको सामाजिक काम र जनतान्त्रिक आन्दोलनका चिरपरिचित व्यक्ति हुन्, खिम विक्रम शाही । २०२७ साल असोज २६ गते बुवा हिरा बहादुर शाही र आमा चन कुमारी शाहीको कोखबाट दोश्रो सन्तानको रुपमा निसिखोला गाउँपालिका वडा नं. ४, बोहरागाउँमा जन्मिएका शाही विद्यालय जीवनबाटै विद्यार्थी आन्दोलन र खेलकुदमा सक्रिय हुनुहुन्थ्यो । प्रभा माध्यामिक विद्यालय बोहरागाउँमा प्रारम्भिक शिक्षा हासिल गरी उत्तर गंगा मावि बुर्तिवाङबाट २०४६ सालमा मावि तह पुरा गरेका शाहीको उच्च शिक्षा भने अधुरै रह्योे ।

२०४० सालमा अखिल नेपाल बाल संगठनमा संगठित भई राजनीतिक यात्रा शुरु गरेका खिम विक्रम शाही, विद्यार्थी कालमा अखिल (छैठौं)मा आवद्ध भई विद्यार्थी आन्दोलनमा सहभागी हुनुभयो । २०४७ सालदेखि अखिल नेपाल युवक संघको जिल्ला समिति, बागलुङमा रहेर काम गर्दै जिल्ला समितिको उपाध्यक्ष समेत बन्नु भयो । २०५४ सालदेखि अस्थायी शिक्षकका रुपमा प्रभा माध्यामिक विद्यालयमा शिक्षण पेशा सुरु गरेदेखि पेशागत आन्दोलनमा पनि सक्रिय रहनु भयो ।

२०६५ साल देखि राष्ट्रिय जनमोर्चाको जिल्ला समितिमा रहेर काम गर्दै आउनु भएका शाही हाल सचिवालय सदस्य रहनु भएको छ । समाजमा हुने अन्याय अत्याचार र विभिन्न विभेदका विरुद्ध जुध्दै आउनु भएका उहाँ विद्यालय, जलविद्युत, स्वास्थ्य, सामुदायिक अध्ययन केन्द्र तथा बाटोघाटोको विकासमा समेत सक्रीय रहनु भएको छ ।

शाही एक सहयोगी, लगनशिल, क्रान्तिकारी र समाजप्रेमी व्यक्तित्व हुनुहुन्छ । उहाँ व्यक्तिगत समस्यालाई भन्दा सामाजिक समस्यालाई प्राथमिकतामा राख्दै देश, जनता र समाजप्रति समर्पित युवा नेता हुनु हुन्छ । पद, प्रतिष्ठा र पैसाको लागि जे पनि गर्ने र व्यक्तिगत स्वार्थमा लिप्त हुने प्रवृति बढेको अवस्थामा उहाँ देश, जनता, पार्टी र न्यायिक आन्दोलनप्रति समर्पित निष्ठावान, मेहनेति, इमान्दार, कर्तव्यनिष्ट र स्वच्छ छविको व्यक्ति हुनु हुन्छ ।

अहिले राष्ट्रिय जनमोर्चा र नेपाल कम्युनिष्ट पार्टी (नेकपा) संयुक्त गठबन्धनका तर्फबाट बागलुङ जिल्ला प्रदेशसभा २ (ख) मा हुने उपनिर्वाचनमा गिलास चिन्ह लिएर साझा उम्मेदवार बनेका खिमविक्रम शाही आफुले संविधानको प्रस्तावनामा उल्लेख भएको समाजवाद उन्मुख राज्य स्थापनाका लागि मुख्य जोड दिनुका साथै यो प्रदेशको आर्थिक समृद्धि र पूर्वधार विकासमा नीतिगत निर्णय गर्ने र व्यवहारिक रुपमा कार्यान्वयन गर्न लागि पर्ने प्रतिवद्धता राख्नु हुन्छ ।

नीतिगत प्रतिवद्धता
 गणतन्त्र र धर्म निरपेक्षता जस्ता संविधानका सकरात्मक उपलब्धीको रक्षा गर्ने,
 आर्थिक समृद्धि र राजनीतिक स्थायित्व कायम गर्ने,
 राष्ट्रियता, सार्वभौमिकता र अखण्डतालाई अक्षुण राख्ने,
 जनतन्त्र, जनजीविका र जनअधिकारको पक्षमा नीति तथा कार्यक्रम निर्माण गर्ने,
 जनतालाई सुशासनको ग्यारेण्टी गरी भ्रष्टचार विरुद्ध जन अभियान सञ्चालन गर्ने,
 केन्द्रिकृत विकास नीतिको भण्डाफोर गर्दै विकेन्द्रीयता र सन्तुलित विकास नीति लागु गरी बेग्ला बेग्लै क्षेत्रको विशिष्टताका आधारमा ग्रामिण विकासको योजना बनाउने,
 पछाडि पारिएको समुदाय, वर्ग र जातजातिको अधिकार, भाषा, संस्कृतिको संरक्षण र विकास गर्दै क्षेत्रीय, जातीय वा राष्ट्रिय एकतालाई मजवुद पार्ने,
 ऐतिहासिक, पुरातात्विक र साँस्कृतिक महत्वका सम्पदाहरुको संरक्षण र संवद्धन गर्ने ।

आर्थिक प्रतिवद्धता
 कृषि र कृषिजन्य उद्योगको विकास गरी किसानको आयश्रोत बृद्धिमा मद्दत पु-याउन विऊ, गोठसुधार, उन्नत पशु तथा पंक्षी, मत्स्य र मौरीपालनका लागि अनुदानको व्यवस्था गर्ने,
 अव्यवस्थित बसोवासलाई व्यवस्थित पार्न एकीकृत बस्ती विकास, खेतियोग्य जमिनको संरक्षण, वनजङ्गल र खानी क्षेत्रको विकास र संरक्षण गर्न रणनीतिक योजना तय गर्ने,
 सरकारले दिर्दै आएको जेष्ठ नागरिक, असमान क्षमता भएका व्यक्ति, अनाथ, असाह्य र बालवालिकाको भत्तामा थप गरी उनीहरुको दैनिक आवश्यकता सहज ढंगबाट पूरा गर्न सक्ने गरी उपलब्ध गराउने,
 युवाको बढ्दो विदेश पलायनलाई रोक्न युवा उद्यमशील घुम्ती कोषको व्यवस्था गरी घरेलु तथा साना उद्योग, कृषि फम, पशुपालन तथा सीपमूलक र उत्पादनशील कार्यमा लाग्न प्रेरित गर्ने,
 पर्यटनलाई उद्योगको रुपमा विकास गरी ग्रामिण क्षेत्रमा पैदलमार्ग र होम स्टे स्थापना, जलयात्रा, रक गार्डेन तथा प्याराग्यलाईडिङ सञ्चालन गर्न सकिने सम्भावित क्षेत्रको अध्ययन गरी आन्तरिक तथा बाह्य पर्यटनको आगमनमा बृद्धि ल्याउने,
 गरिव घरपरिवारको पहिचान गरी सामाजिक सुरक्षा भत्ताका साथै सुपथ मुल्यका पसल र सहकारी स्थापना गरी आर्थिक विकासमा सहयोग पु-याउने ।

पूर्वधार विकास तथा शिक्षा सम्बन्धि प्रतिवद्धता
 चालु मोटरबाटोलाई स्तरउन्नत र विस्तार गर्नु साथै नयाँ सडक निर्माणका लागि स्थानीय बस्तीको माग बमोजिम बिस्तार गर्ने,
 खानेपानी, सिंचाई, तटबन्धन र भवन आवश्यकता अनुसार क्रमागत निर्माण गर्दै जाने र निर्माण भएका योजनाको पूर्न निर्माण गरी आधुनिकिकरण गर्ने,
 सबै नागरिकको पहुँचमा निःशुल्क आधुनिक शिक्षा र स्वास्थ्य सुविधा उपलब्ध गराउने,
 प्राकृतिक स्रोत साधनको समुचित उपयोग गर्न स्थानीय लगानी र जनसहभागीतामा साना जलविद्युत निर्माण, बन्द रहेका खानीको पूर्न सञ्चालन र जडिवुटी खेती तथा प्रशोधन केन्द्र स्थापना गरी स्थानीय तह मै रोजगारीको व्यवस्था गर्ने ।

स्थानीय प्रतिवद्धता
 ढोरपाटनमा रहेको एयरपोर्टको तत्काल सञ्चालनमा गर्न आवश्यक पहल गर्नुका साथै यस क्षेत्रको पर्यटन विकासको योजना तय गर्ने,
 मध्यपहाडि लोकमार्ग र सालझण्डी ढोरपाटन लोकमार्गदेखि ग्रामीण तहलाई जोड्ने गरी ग्रामीण सडको निर्माण र विस्तार गर्ने,
 उत्तरगंगा जलासययुक्त जलविद्युत परियोजना बागलुङ कै भुगोलमा निर्माण गर्न जोड दिने,
 बुर्तिवाङ र त्यसको नजिक रहेका सडक सञ्जाललाई सहरीकरण गर्दै स्तरबृद्धिका साथै कालोपत्रेको काम गर्ने र बुर्तिवाङ, बोङ्गादोभान, खुङ्खानी, तमान, दरबाङ हुँदै धवलागिरी वेसक्याम्पसम्म पर्यटकमैत्री सडक निर्माणको लागि पहल गर्ने,
 बुर्तिवाङ, खुङ्गा, तमान, दरबाङ मोटरबाटो, बोहरागाँउ देखि प्युठान जोड्ने मोटर बाटो, चाचल, सामा, बराहताल मोटरबाटो, बुर्तिवाङ, मस्ती, अर्नाकोट मोटरबाटो, हुन्द्रफेदी, लुकुरबन, खोलाखर्क रमुवा मोटरबाटो निर्माण तथा विस्तार गर्ने,
 बुर्तिवाङ, निसी, निशलढोर, भुजीढोर, बराहताल, बोङ्गादोभान हुँदैं बुर्तिवाङ रिङरोड निर्माण गर्ने,
 बुर्तिवाङमा आधुनिक सहरीकरणको कार्यक्रम सञ्चालन गर्नुका साथै झिवाखोला, निसी, बोवाङ, तमान र ढोरपाटनमा साना सहरी विकास कार्यक्रम लागु गर्ने,
 पर्यटन विकासमा सहयोग पु¥याउनका लागि अर्नाकोट, नरसिंहकोट, बराहताल, रुद्रताल, जस्ता स्थानको विकास र पर्वद्धनमा ध्यान दिर्दै खुङ्खानी र बोङ्गादोभानमा रक गार्डेन र होमस्टे ९घरवास कार्यक्रम० सञ्चालनको सम्भावना अध्ययन गरी निर्माणका लागि पहल गर्ने,
 ढोरपाटन क्षेत्रको एकिकृत पर्यटन विकासको लागि जोड दिने,
 ग्रामीण विद्युतिकरणलाई विस्तार गरी फलामे पोलयुक्त क्षेत्र बनाउने तथा निसीखोला, भुजीखोला र तमानखोलामा उत्पादन हुन सक्ने जलविद्युत उत्पादन गरी केन्द्रिय लाईनमा जडान गर्ने,
 किसानलाई पायक पर्ने गरी कृषि संकलन केन्द्र र दुग्ध संकलन तथा चिस्यान केन्द्रहरु स्थापनामा जोड दिने,
 ढोरपाटनलाई आलु पकेट क्षेत्र घोषणा गरी आलु उत्पादन वुद्धि गरी बजारीकरणको ब्यवस्था गर्ने,
 चेलु च्याङ्ग्राको घुम्तीगोठलाई व्यवस्थित गर्न आवश्यक पहल गर्नुका साथै फलफुल, पशुपालन, मौरीपालन, तरकारी तथा नगदे वाली, विऊ उत्पादनलाई व्यवसायिकरण र बजारीकरण गर्ने र पकेट क्षेत्र तोकी उत्पादनमा जोड दिने,
 कृषि, विज्ञान, कम्प्युटर जस्ता प्राविधिक विषयका क्याम्पस सञ्चालन गर्ने,
 खानेपानी अभाव भएका स्थानमा लिफ्टिङ मार्फत खानेपानी आपूर्ति गर्ने र सहज स्रोत भएका स्थानमा समेत स्वच्छ खानेपानीको व्यवस्था गर्ने,
 बोङ्गादोभान र बोहोरागाउँमा न्यूनतम पनि २५ सैया भएको अस्पताल निर्माण गर्ने र बुर्तिवाङमा रहेको जिल्ला अस्पताललाई आधुनिक र सुविधा सम्पन्न बनाउने,
 महिला, दलित तथा जनजातिका लागि विशेष आयआर्जनका कार्यक्रम सञ्चालन गरिने,
 विद्यालयमा अपुग शिक्षक दरवन्दी थप गर्ने साथै अस्थायी शिक्षकको समस्या समाधानमा विशेष जोड दिने,
 जनताले भोग्नु परेको सरकारी काममा हुने प्रशासनिक झन्झटलाई न्यूनिकरण गरी छिटो छरितो तरिकाबाट एक टेबुल सबैका हुने गरी प्रशासनिक कार्यको व्यवस्था गर्ने ।