काठमाडौं । प्रधानमन्त्री केपी शर्मा ओलीले संसद विघटन गरेर असंवैधानिक काम गरेको भन्दै आन्दोलित अखिल (छैठौं) सहित पाँच विद्यार्थी संगठनले दोस्रो चरणको आन्दोलन घोषणा गरेका छन् ।
मंगलबार बसेको पाँच विद्यार्थी संगठनको बैठकले पहिलो चरणको कार्यक्रम सम्पन्न भएको समीक्षा गर्दै प्रतिगमनविरुद्ध सिठी र शंख फुक्ने कार्यक्रम तय गरेका छन् ।
घोषित कार्यक्रम अनुसार प्रतिगमन विरुद्धअसार २४ गते देशव्यापी सिट्ठी जुलुस गर्ने र असार २७ गते माइतीघरमा शंख फुकेर विरोध प्रदर्शन गर्ने कार्यक्रम छ ।
‘संयुक्त विद्यार्थी संगठनले संसद विघटन, केपी ओलीको निरंकुशता, अधिनायकवाद र स्वेच्छाचारी शासनको विरुद्धमा सञ्चालन भएको पहिलो चरणको आन्दोलन सफल भएको समीक्षा गरिएको छ । सर्वोच्च अदालतले प्रतिनिधिसभाको पुनर्स्थापना गर्ने कुरामा संयुक्त विद्यार्थी आन्दोलन विश्वस्त रहेको छ’ पाँच विद्यार्थी संगठनले जारी गरेको विज्ञप्तीमा उल्लेख छ ।
विद्यार्थी संगठनहरुले धरानको वीपी कोइराला स्वास्थ्य विज्ञान प्रतिष्ठानमा उपकुलपति डा. ज्ञानेन्द्र गिरीको राजीनामा माग गरेका छन् । यस्तै, उनीहरुले शिक्षक सेवा आयोगको परीक्षा सञ्चालन गर्न, चितवनकी छात्रा सुजिता भण्डारी मृत्यु प्रकरणको छानविन गर्न माग गरेका छन् ।
हिमालयन पुनर्बीमा कम्पनीको लाइसेन्स दिँदा बीमा समितिले विधि र प्रक्रिया मिचेको तथा अरबौं आर्थिक चलखेल गरिएको भन्दै पुनर्बीमा कम्पनीको लाइसेन्स प्रक्रिया तत्काल रोकी दोषीलाई कडा कारवाही गर्न माग गरिएको छ।
विपक्षी पाँच दल निकट नेविसंघ, अखिल क्रान्तिकारी, अनेरास्ववियु, अखिल (छैठौं) र समाजवादी विद्यार्थी युनियनले प्रतिगमनविरुद्ध संयुक्त आन्दोलन गर्दै आइरहेका छन्।
