काठमाडौं । नेपाल कम्युनिस्ट पार्टी(मसाल) ले गण्डकी प्रदेशमा राष्ट्रिय जनमोर्चाका सांसदले गरेको पार्टी नीति उल्लंघनले सम्पूर्ण पार्टी पंक्ति र शुभचिन्तक जनसमुदायलाई स्तब्ध बनाएको जनाएको छ ।
सो कार्यले पार्टीको ऐतिहासिक प्रतिष्ठा र छविमा धक्का पुगेको मसालको ठहर छ । त्यसप्रकारको अनुशासनहीन गतिविधिको छानबिन र आवश्यक कारबाही गर्ने मसालले चेतावनी दिएको छ ।
बिहीबार महामन्त्री मोहनविक्रम सिंहले जारी गर्नुभएको विज्ञप्तिमा भनिएको छ, ‘गण्डकी प्रदेशमा सरकार परिवर्तन सम्बन्धमा हाम्रो वैधानिक मोर्चाका कतिपय सांसदद्वारा नै पार्टीको नीति र निर्णयको उलङ्घन भएको छ । उक्त कार्यले पार्टीको ऐतिहासिक प्रतिष्ठा र छविमा धक्का लाग्न गएको छ । त्यसले सम्पूर्ण पार्टी पङ्क्ति तथा शुभचिन्तक जनसमुदायलाई स्तब्ध बनाएको छ । त्यस प्रकारको कार्य पार्टीको नीति, निर्णय र अनुशासन विरुद्ध भएकोले त्यसको छानवीन र अनुसन्धान गरी आवश्यक कारवाही अगाडि बढाइने कुराको हामीले सम्पूर्ण जनसमुदायलाई जानकारी गराउन चाहन्छौँ ।’
गण्डकी प्रदेश सभामा राजमोबाट निर्वाचित सांसद कृष्ण थापाले पार्टी नीति तथा निर्देशनको उल्लंघन गर्दै एमालेलाई सघाएका थिए । सो कार्यले पार्टीको प्रतिष्ठामा आँच पुगेको मसालले जनाएको छ ।
