शंकरप्रसाद पोख्रेल/तम्घास (गुल्मी) ।।
राष्ट्रिय जनमोर्चाका अध्यक्ष चित्रबहादुर केसीले प्रधानमन्त्री केपी ओलीलाई मूर्ख सिकारी झैँ भएको बताउनुभएको छ ।
मूर्ख सिकारीहरूले दिनभरिको मिहिनेतका साथ मारेको माछा खोलामा फालेर मृगको पछि दगुर्दा माछा र मृग दुवै गुमाएको किंवदन्ती सुनाउँदै उहाँले भन्नुभयो– ‘प्रधानमन्त्रीले पनि मूर्ख सिकारीले झैँ गर्नुभयो ।
प्रधानमन्त्री ओलीले आफ्नै प्रधानमन्त्री रहेको जननिर्वाचित प्रतिनिधि सभालाई विघटन गर्नुभयो’ उहाँले अगाडि भन्नुभयो– ‘त्यसपछि उहाँको माग के भन्दा आफ्नो नेतृत्वमा दुईतिहाइ बहुमतको सरकार ।’
उहाँले योभन्दा मुर्ख कुरा केही नभएको दावी गर्दै भन्नुभयो– ‘ढुक्कसँग दुईतिहाइको हाराहारीमा बहुमत भएको संसदलाई विघटन गर्नुभन्दा मूर्खता अरू केही हुन सक्दैन ।’
उहाँले भन्नुभयो– ‘प्रधानमन्त्री ओलीलाई घिउ पचेन ।’
कार्यक्रमको प्रमुख अतिथिको आसनबाट बोल्दै राजमो अध्यक्ष केसीले प्रधानमन्त्री ओलीले संसद विघटन गरेर गम्भीर गल्ती गरेको बताउँदै अदालतले यसभन्दा अघि जे गरे पनि यस पटक जनताको पक्षमा फैसला गरेको बताउनुभयो ।
‘अदालतले पाप पखाल्यो’ अध्यक्ष केसीले भन्नुभयो– ‘यसभन्दा अघि जे गरे पनि अदालत, न्यायाधीस, वकिलहरू प्रतिनिधि सभा पुनस्र्थापनाको पक्षमा उभिए । त्यसका लागि उहाँहरूलाई धन्यवाद दिनुपर्दछ ।’
उहाँले संसद पुनस्र्थापना हुनु राम्रो भए पनि अब बन्ने सरकारको क्रममा सांसदको खरिदबिक्रीदेखि राष्ट्रघाती सन्धिसम्झौता हुन सक्नेतर्फ सचेत गराउँदै जनताले तिनीहरूको गतिविधिलाई खबरदारी गर्नुपर्ने बताउनुभयो ।
उहाँले देशमा सङ्घीयता घाँडो भएकोले त्यसलाई खारेज गर्न आग्रह गर्नुभयो ।
अहिले नै धान्न धौ धौ भएको सङ्घीयता खारेज गर्न जनता एक पटक फेरि सडकमा उत्रिनुपर्ने आवश्यकतामा उहाँले जोड दिनुभयो ।
सम्बोधनको क्रममा उहाँले मिलेनियम च्यालेन्ज कर्पोरेसन (एमसिसी) सम्झौता राष्ट्रघाती भएकाले त्यसको खारेज हुनुपर्ने माग गर्नुभयो ।
राष्ट्रिय जनमोर्चा कालीगण्डकी गाउँपालिका समितिको आयोजनामा २०७७ फागुन १४ गते पालिकाकेन्द्र पुर्तिघाटमा आयोजना गरेको बृहत् जनसभालालाई सम्बोधन गर्दै उहाँले यस्तो अभिव्यक्ति दिनुभएको हो ।
कार्यक्रममा राष्ट्रिय जनमोर्चाकी केन्द्रीय सदस्य तथा कालीगण्डकी गाउँपालिकाकी उपाध्यक्ष तारा थापा, मूल प्रवाह अखिल भारत नेपाली एकता समाजका केन्द्रीय सदस्य रामकुमार क्षेत्री, राष्ट्रिय जनमोर्चाका गुल्मी जिल्ला सचिव छविलाल सर्तुङ्गी र नेकपा (मसाल) गुल्मीका प्रवक्ता ओमेन्द्र कुँवरले पनि मन्तव्य राख्नुभएको थियो ।
जनसभामा रक्तिम सांस्कृतिक अभियानका सचिव हेमराज पुन, राष्ट्रिय जनमोर्चा गुल्मीका अध्यक्ष जीवन राना, राष्ट्रिय जनमोर्चा पर्वत जिल्ला अध्यक्ष गोविन्द पौडेल, राष्ट्रिय जनमोर्चा गुल्मीका उपाध्यक्ष रामेश्वर खत्री, राजमो गुल्मीका कोषाध्यक्ष टेकबहादुर केसी, जिल्ला सदस्य हरि न्यौपाने र पूर्णबहादुर थापा, अखिल नेपाल जनजाति सम्मेलन गुल्मीका अध्यक्ष गुमानसिंह पुन, अखिल नेपाल युवक सङ्घका गुल्मी जिल्लाध्यक्ष खिमबहादुर बुचा, राजमो जिल्ला सदस्य पुन बहादुर थापा, युगदर्शनका संवाददाता शङ्करप्रसाद पोख्रेल, रक्तिम सांस्कृतिक अभियानकी उषा थापा, राजमो जनप्रतिनिधि मीरा थापा, क्षितिज क्षेत्री, राजमो सत्यवतिका मित्रलाल तरामु, युवक युवक सङ्घ कालीगण्डकीका मेघराज शर्मालगायतको आतिथ्यता रहेको थियो ।
जनसभाको अध्यक्षता राजमो कालीगण्डकी गाउँपालिका समितिका अध्यक्ष गङ्गा केसीले गर्नुभएको थियो भने सञ्चालन राजमो गाउँपालिका समितिकै लेखान्त पुनले गर्नुभएको थियो । घनश्याम ढकालको स्वागत मन्तव्यका साथ अघि बढेको उक्त कार्यक्रममा रक्तिम सांस्कृतिक अभियानका केन्द्रीय तथा जिल्लास्तरका कलाकारहरूले जोसिलो गीत तथा नृत्य प्रस्तुत गर्नुभएको थियो ।
जनसभापूर्व पुर्तिघाट बजारमा हजारौँको नेता–कार्यकर्ताको सहभागितामा जुलुस सम्पन्न भएको थियो । बजार परिक्रमा गरेपछि सो जुलुस गाउँपालिकाको केन्द्रमा गएर जनसभामा परिणत भएको थियो ।
राजमो कार्यालय उद्घाटन
सोही क्रममा राष्ट्रिय जनमोर्चा कालीगण्डकी गाउँपालिका कार्यालयको उद्घाटन गरिएको छ । राष्ट्रिय जनमोर्चाका अध्यक्ष चित्रबहादुर केसीले रिबन काटेर कार्यालयको उद्घाटन गर्नुभएको थियो । सो अवसरमा राष्ट्रिय जनमोर्चा केन्द्रीय सदस्य तथा गाउँपालिका उपाध्यक्ष तारा थापा, राजमोका जिल्लाध्यक्ष जीवन राना, राजमो गाउँपालिका समितिका अध्यक्ष गङ्गा केसी, मूल प्रवाह अखिल भारत नेपाली एकता सकाजका केन्द्रीय सदस्य रामकुमार क्षेत्रीलगायतको उपस्थिति रहेको थियो ।
