पुष्कर भट्ट, महेन्द्रनगर ।
राष्ट्रिय जनमोर्चाका केन्द्रीय सदस्य एवम् सुदूरपश्चिम इन्चार्ज मनोज भट्टले सरकारले निर्वाचन गराउनका लागि प्रतिनिधि सभा विघटन नगरेको बताउनुभएको छ ।
मंगलबार बेलौरीमा आयोजित विरोध सभालाई सम्बोधन गर्दै नेता भट्टले प्रधानमन्त्री केपी ओलीले निर्वाचन गरेर सत्ता हस्तान्तरण गर्न नभइ आफ्नो सत्ता लम्ब्याउनका लागि संसद विघटन गरेको बताउनुभयो ।
उहाँले कोरोना विरुद्धको खोपका लागि भारत चीन लगायतका देशलाई गुहार मागिरहेको सरकारले पचासौं अर्ब रुपैयाँ खर्चेर चुनाव गर्न नसक्ने दाबी गर्नुभयो ।
‘ओलीले आफूलाई असहयोग गरेको आरोपमा प्रतिनिधि सभा भंग गरेका छन् । उनकै नेतृत्वमा तीनवटा बजेट र नीति तथा कार्यक्रम प्रतिनिधि सभाले पास गरेको छ’ नेता भट्टले प्रश्न गर्नुभयो, ‘प्रधानमन्त्रीलाई संसदले कहाँनेर असहयोग गर्यो ? उनले आफूविरुद्ध अविश्वासको प्रस्ताव आउने आशंकामा प्रतिनिधि सभा विघटन गरेका छन् । यो चुनाव गराउनका लागि होइन, आफ्नो सत्ता लम्ब्याउनका लागि मात्रै हो ।’
भट्टले प्रतिनिधि सभा पुनर्स्थापना गर्नु नै अहिलेको संकट निकासको प्रारम्भ भएको स्पष्ट पार्नुभयो ।
राष्ट्रिय जनमोर्चा कञ्चनपुरले ‘गणतन्त्र, राष्टियता र धर्मनिरपेक्षको रक्षा गरौं, ओली सरकारको असंवैधानिक कदम , संघीयता र भ्रष्टाचारको विरोध गरौं, प्रतिनिधि सभा पुनस्थापना गर’ भन्ने नारासहित एक महिने कार्यक्रम सञ्चालन गरिरहेको छ ।
बेलौरी बजारको भीमदत्त स्मारकमा आयोजित सभामा राजमो केन्द्रीय सदस्य लोकेन्द्र लम्साल, जिल्ला अध्यक्ष रामबहादुर कार्की, तराइ मधेश जनवादी मोर्चाका महासचिव राजाराम चौधरी, जातीय समता समाजका महासचिव गोविन्द विक, अखिल नेपाल महिला संघका केन्द्रीय सदस्य कमला चौधरीले सम्बोधन गर्नुभएको थियो ।
राजमो जिल्ला सदस्य रङ्गबहादुर चौधरीको अध्यक्षता, सचिव अहिमान थापाको स्वागत तथा कोषाध्यक्ष हरि लम्सालले संचालन गर्नुभएको कार्यक्रममा अखिल नेपाल युवक संघका केन्द्रीय सचिव प्रसान्त थापालगायतको उपस्थिति रहेको थियो ।
