ने.का. का सभापति शेर बहादुर देउवाले संसदका विघटनका विरुद्धको संघर्षलाई कमजोर पार्ने प्रयत्न गरिरहेका छन् । त्यसका पछाडिको रहस्य के हो ? प्रधानमन्त्री ओलीले खोलिदिएका छन् ।

उनीहरु दुबै जनाका बीचमा नयाँ परिवर्तित परिस्थितिमा आलोपालो गरेर प्रधानमन्त्री हुने समझ्दारी भएको कुरा ओलीले सार्वजनिक गरेका छन् । त्यो कारणले नै देउवाले संसदको विघटनका विरुद्ध र विघटित संसदको पुर्नस्थापनका पक्षको आन्दोलनलाई रोक्न प्रयत्न गरिरहेको कुरा बुझ्न सकिन्छ । उनको त्यो प्रयत्नलाई असफल बनाएर नेका संघर्षमा अगाडि बढ्नेछ वा ओली त्यसलाई (नेकालाई) ‘ब्रेक’ लगाउन सफल हुनेछन् । त्यो कुरा आउने दिनमा नै प्रष्ट हुँदै जानेछ ।

देउवाको पहिले पनि प्रधानमन्त्री पदको लागि २÷२ पल्ट संसद राजालाई बुझाएर प्रतिगमनको सेवा गरेकोे इतिहास रहेको छ । उनको त्यस प्रकारको इतिहास अहिले पुनः ओली सरकारद्वारा संसदको विघटनको सन्दर्भमा पनि दोहोरिएको कुरा प्रधानमन्त्री ओलीको भनाईबाट अनुमान गर्न सकिन्छ ।

नेपाली काँग्रेसको वि.पीको नेतृत्वमा राणा शासनका विरुद्ध संघर्ष, गणेशमानको नेतृत्वमा निरङ्कुश राजतन्त्र र पञ्चायती व्यवस्थाका विरुद्ध संघर्ष तथा गिरिजा प्रसादको नेतृत्वमा प्रतिगमनका विरुद्ध संघर्ष, गणतन्त्रको स्थापनामा योगदानको समेत लामो इतिहास रहेको छ ।

यो आश्चर्यको कुरा हो कि त्यसरी वि.पी, गणेशमान, कृष्णप्रसाद भट्टराई र गिरिजा प्रसादको नेतृत्वको परम्परा रहेको ने.कामा शेरबहादुर जस्तो बारम्बार प्रतिगमनको सेवाका लागि बदनाम भएका व्यक्ति कसरी त्यो पार्टीको नेतृत्वमा पुग्न सफल भए ?

यो प्रश्न उठाउन सकिन्छ, नेकाको चरित्रमा नै धेरै ह्रास भएकोले नै शेर बहादुर जस्ता व्यक्ति बारम्बार त्यसको नेतृत्वमा पुग्न सफल भएका त होइनन् ? जे होस, त्यस प्रकारको नेतृत्व कायम रहेमा त्यो पार्टी अरु पतनको बाटोमा बढ्दै जाने कुरा निश्चित छ । प्रतिगामी दिशा समातेका ओलीको काधमा चढेर शेर बहादुर वा नेकाले धेरै टाढासम्म यात्रा गर्न सक्ने छैनन् ।

(नेकपा (मसाल) का महामन्त्री मोहनविक्रम सिंहको फेसबुक स्ट्याटसबाट)