काठमाडौँ । इजरायलले आगामी महिनादेखि नेपालबाट केयर गिभर (हेरचाह कामदार) लैजाने प्रक्रिया सुरु गर्ने भएको छ । गत असोजमा इजरायलका लागि नेपाली राजदूत अन्जान शाक्य र इजरायली परराष्ट्र मन्त्री गावी अस्केनाजीबिच भएको श्रम सम्झौतानुसार इजरायलले केयर गिभर लैजाने भएको हो ।
नेपालका लागि इजरायली राजदूत हनान गोडरले आगामी महिनादेखि केयर गिभरका लागि कामदार लैजाने प्रक्रिया सुरु गर्ने जानकारी दिनुभयो । नेपालबाट इजरायलको नर्सिङ क्षेत्र, अस्पताल, नर्सिङ होम, दिवा सेवा केन्द्रलगायतमा नेपाली केयर गिभर लैजाने सम्बन्धमा गत असोज १४ गते सम्झौता भएको थियो ।
सोही सम्झौतालाई कार्यान्वयन गर्दै आगामी महिनादेखि कामदार छनौटको प्रक्रिया सुरु गरिने राजदूत गोडरले बताउनुभयो । सम्झौता कार्यान्वयनमा आएपछि नेपालबाट धेरै सङ्ख्यामा कामदारहरू जान सक्ने पनि राजदूत गोडरको भनाइ छ ।
सम्झौतानुसार सरकारी तबरबाट नेपाली श्रमिक कामका लागि इजरायल जाने छन् । यस्तै, नेपाली श्रमिकले इजरायली नागरिक सरहको सेवा सुविधा र संरक्षणसमेत पाउने छन् ।
