इलाम । यस वर्ष हिउँदको समयमा रोप्ने आलुको बिउ हाराहार भएपछि किसान चिन्तित देखिएका छन् । कोरोनाले भारतबाट आलु नआएपछि व्यवसायीले गाउँ पसेर नै आलु किन्नुपर्दा अहिले बिउसमेत नभएको हो ।
गएका वर्षहरूमा आलु नबिक्दा प्रशस्त मात्रामा आलुको बिउ रहन्थ्यो तर यस वर्ष भाउ आएसँगै आलु बिकेकाले बिउ आलु सङ्कट भएको हो ।
“राम्रो भाउ आएकाले आलु बेचियो तर अब हिउँदमा रोप्ने आलु छैन” सन्दकपुर गाउँपालिकास्थित माइमझुवाका किसान गङ्गा गुरुङले भन्नुभयो– “गएका वर्षहरूमा हिउँदमा रोप्ने घरमै हुन्थ्यो तर यस पटक भने कहाँबाट बिउ ल्याएर रोप्ने समस्या भएको छ ।
गुरुङका अनुसार यस वर्ष विगतमा भन्दा आलु उत्पादन बढेको थियो ।
गत साल किसानले प्रतिमन रु। एक हजारमा आलु बेच्नुपथ्र्यो तर यस पटक प्रति मन रु। तीन हजारमा आलु बिक्यो ।
किसानले माघदेखि फागुनको मध्यसम्ममा हिउँदे आलु रोप्ने गर्छन् । उत्पादनका हिसाबले पनि अन्य यामको भन्दा उल्लेखनीय मात्रामा यो याममा आलु फल्छ । पहाडी क्षेत्रमा मुख्य सब्जीका रूपमा आलु प्रयोग हुन्छ ।
यो यामको आलुलाई धेरै गोडमेल र सिँचाइ पनि गर्नु नपर्नाले किसानले प्रशस्त मात्रामा हिउँदे आलु रोप्ने गरेका थिए ।
गएको वर्ष २० मन हिउँदे आलु लगाएका माईजोगमाई गाउँपालिकाका अन्नप्रसाद राई यसपटक नगन्य मात्रामा बिउ रहेको बताउनुहुन्छ ।
“घरमै आएर व्यवसायीले धेरै मूल्य दिने भनेपछि सबै बेचिहालियो, अब रोप्ने बीउ नै छैन”, राईले भन्नुभयो, “हिउँदे आलु नरोपी बर्खे मात्र रोपौँ कि भन्ने सोच्दैछु ।” किसानले फागुन–चैतमा रोप्ने हिउँदे आलु जेठको अन्तिम असार मध्यसम्ममा उत्पादन हुन्छ । आलुको उत्पादन उठाएर अन्य खेती गर्न सकिने भएकाले पनि किसाले प्रायः हिउँदे आलुको खेती गर्छन् ।
