काठमाडौँ । सउदी अरब नेपाली एकता समाजले २०७७ भदौ १७ गते राती परेको अविरल वर्षाका कारण बागलुङको ढोरपाटनमा गएको भीषण बाढीपहिरोप्रति दुःख प्रकट गरेको छ ।
भदौ १९ गतेका दिन अध्यक्ष राजकुमार धिताल र महासचिव जेबी फौजाको हस्ताक्षरमा जारी प्रेसविज्ञप्तीमा दुःख प्रकट गरिएको हो ।
वक्तव्यमा भनिएको छ–
“बागलुङ ढोरपाटन नगरपालिका ७, ८ र ९ नम्बर वडामा भदौ १७ गते राती परेको अविरल वर्षाका कारण भुजिखोलाको शिर देउरालीबाट गएको ठुलो पहिरोले धेरै जनधनको क्षति भएको दुखद् खबर प्राप्त भएको छ । यस प्राकृतिक प्रकोपमा परेका सम्पूर्ण पीडितको उद्धार र राहतमा सम्बन्धित निकायको ध्यान जान जरुरी छ । यस आपत्बिपत्को घडीमा सम्पूर्ण सङ्घसंस्था, समाजसेवी जनसमुदायलाई उद्धार र राहतका लागि एक हुन अनुरोध गर्दछौँ । हामी मृतकप्रति भावपूर्ण श्रद्धाञ्जली तथा शोकसन्तप्त परिवारप्रति समवेदना प्रकट गर्दछौँ । साथै बेपत्ताको खोजी, घाइतेको उपचार र बिचल्ली परेकाको व्यवस्थापनमा लाग्न सम्बन्धित निकायलाई अनुरोध गर्दछौँ ।”
