काठमाडौँ । भारत भ्रमण गर्ने टपटेन देशमध्ये नेपाल दशौँ स्थानमा परेको छ । भारतीय पर्यटन मन्त्रालयको तथ्याङ्कमा सो स्थिति देखिएको हो ।
सन् २०२५ मा भारतमा ९१ लाख ४८ हजार सात सय ६६ विदेशी पर्यटक भित्रिँदै नेपाल दशौँ स्थानमा छ ।
स्वास्थ्योपचार, धर्मकर्म र घुमफिरमा बढी नेपाली भारत जाने गर्छन् । गत वर्ष दुई लाख १८ हजार छ सय ४१ नेपालीले भारत भ्रमण गरेका थिए । यो सङ्ख्या भारत भ्रमण गर्ने टपटेन देशभित्र पर्दछ, जुन कुल पर्यटक आगमनको २.४ प्रतिशत हो ।
सन् २०२४ को तुलनामा २०२५ मा भारत भ्रमणमा जाने नेपाली पर्यटक सङ्ख्या बढेको छ । अघिल्लो वर्ष दुई लाख दुई हजार पाँच सय एक नेपालीले भारत भ्रमण गरेको तथ्याङ्कमा उल्लेख छ । त्यस वर्ष नेपाल एघारौँ स्थानमा थियो ।
नेपालीले भारत भ्रमण गर्ने प्रमुख सिजन सेप्टेम्बर देखिएको छ भने कम जाने महिना मे हो ।
सन् २०२५ मा भारत भ्रमणमा जाने पर्यटकको पहिलो स्थानमा अमेरिका छ । अमेरिकाका १८ लाख ८१ हजार सात सय ७२ पर्यटक भारत भ्रमणमा गएका थिए, जुन कुल आगमनको २०.१ प्रतिशत बराबर हो ।
दोस्रो स्थानमा बेलायत छ । बेलायतबाट १० लाख ८४ हजार तीन सय १० पर्यटक पर्यटक भारत गएको देखिन्छ ।
तेस्रो स्थानमा अस्ट्रेलिया देखिएको छ । त्यहाँबाट पाँच लाख ४५ हजार चार सय ३८ पर्यटक भारत भ्रमण गर्न पुगेका थिए ।
क्यानडा चौथो स्थानमा छ । क्यानडाबाट पाँच लाख ४४ हजार तीन सय २६ पर्यटक भारत भ्रमणमा गएका थिए ।
पाँचौँ स्थानको बङ्गलादेशबाट चार लाख ६८ हजार छ सय २१ पर्यटकले भारत भ्रमण गरेका थिए ।
त्यस्तै छैटौँ स्थानमा मलेसिया छ । त्यहाँका तीन लाख ३६ आठ सय ३२ जनाले भारत भ्रमण गरेका थिए ।
श्रीलङ्का भारत भ्रमण गर्ने देशमध्ये सातौँ स्थानमा छ । यहाँबाट तीन लाख छ हजार चार सय २१ जना पर्यटकले भारत भ्रमण गरेका थिए ।
आठौँ स्थानमा जर्मनी रहेको छ । जर्मनीबाट दुई लाख ७३ हजार पाँच सय २६ जनाले भारत भ्रमण गरेको तथ्याङ्कमा उल्लेख छ ।
नवौँ स्थानमा जापान छ । यहाँका दुई लाख १९ हजार एक सय ७४ जना पर्यटक भारत भ्रमणमा गएका थिए ।
सन् २०२५ मा विश्वभरि डेढ अर्ब मानिस घुमफिरमा निस्किएका थिए । त्यसमध्ये धेरै विदेशी पर्यटक आकर्षित गर्ने देशमध्ये भारत बाइसौँ स्थानमा थियो ।
