लण्डन । चार वर्षअघि अमेरिकी अन्तरिक्ष एजेन्सी नासाले पृथ्वीको प्रतिरक्षा परीक्षणका क्रममा ठोक्काएको क्षुद्रग्रहको युरोपेली अन्तरिक्ष यानले नजिकबाट निरीक्षण सुरु गरेको छ।

युरोपेली अन्तरिक्ष एजेन्सी (ईएसए) ले बुधबार घोषणा गरेअनुसार ‘हेरा’ नामक अन्तरिक्ष यानले अहिले ‘डिडिमोस’ क्षुद्रग्रह र त्यसको सानो उपग्रह ‘डिमोर्फोस’ को २५ देखि ३० किलोमिटरको दूरीबाट अध्ययन गरिरहेको छ।

पृथ्वीलाई भविष्यमा आउन सक्ने घातक अन्तरिक्ष चट्टानबाट जोगाउन सकिन्छ वा सकिँदैन भनी परीक्षण गर्न नासाले सन् २०२२ मा आफ्नो ‘डार्ट’ यानलाई जानिजानी डिमोर्फोसमा ठोक्काएको थियो। उक्त ठक्करले डिडिमोसको परिक्रमा गर्ने डिमोर्फोसको कक्षलाई छोट्याइदिएको थियो भने सूर्यको परिक्रमा गर्ने यसको मार्गमा समेत सामान्य परिवर्तन ल्याएको थियो।

सन् २०२४ मा प्रक्षेपण गरिएको सानो कारको आकारको हेरा यान आगामी महिना उक्त क्षुद्रग्रहको अझ नजिक अर्थात् २० किलोमिटरको दूरीमा पुग्नेछ। ईएसएका अधिकारीहरूले यस अभियानलाई आफ्नो उत्कृष्ट रोबोटिक जासूसमार्फत गरिने ‘दुर्घटनास्थलको अनुसन्धान’ का रूपमा लिएका छन्।

हेरा यानमा २५ वटा वैज्ञानिक उपकरणका साथै जुत्ताको बाकस आकारका दुईवटा ‘क्युबस्याट’ रहेका छन्। यी उपकरणले डिमोर्फोसको अझ सूक्ष्म सर्वेक्षण गर्नेछन् भने त्यसमा अवतरण गर्ने प्रयाससमेत गर्नेछन्।

डार्ट (डबल एस्टेरोइड रिडाइरेक्सन टेस्ट) यान ठोक्किँदा डिमोर्फोसबाट ढुङ्गा र चट्टानका टुक्राहरू उछिट्टिएका थिए, जसले ठक्करको गतिलाई थप बल पुर्‍याएको थियो।

उछिट्टिएका भग्नावशेषको धर्सा महिनौँसम्म अन्तरिक्षमा १० हजार किलोमिटरभन्दा परसम्म फैलिएको थियो। तीमध्ये केही भग्नावशेष अझै पनि आसपासमै हुन सक्ने वैज्ञानिकहरूको अनुमान छ। करिब १५१ मिटर (५०० फिट) व्यास भएको डिमोर्फोसको तुलनामा डिडिमोस करिब ७८० मिटर व्यासको छ।
प्रस्तुत समाचारलाई संक्षिप्तरुपमा समाचार बनाईदिनुहोस्‌