सियोल, २६ असोज । दक्षिण कोरियासँगको सीमामा बारुदी सुरुङ विस्फोटपछि तनाव बढिरहेका बेला उत्तर कोरियाले सोमबार पूर्वी तटबाट जापानको सागरमा धेरै ब्यालेस्टिक मिसाइल प्रहार गरेको दक्षिण कोरियाली सेनाले जनाएको छ ।

सेनाको संयुक्त चिफ अफ स्टाफका अनुसार स्थानीय समयअनुसार बिहान ९ः२० बजे प्योङयाङ क्षेत्रबाट प्रक्षेपण गरिएका केही मिसाइलले ९०० किलोमिटरभन्दा बढी दूरी पार गरेका छन् । दक्षिण कोरिया र अमेरिकाले मिसाइलको विशेषता विश्लेषण गरिरहेका छन् । जापानले पनि कम्तीमा एउटा शङ्कास्पद ब्यालेस्टिक मिसाइल प्रक्षेपण भएको पुष्टि गरेको छ । दक्षिण कोरियाले सैन्य तयारीको समीक्षा गर्न आकस्मिक सुरक्षा बैठक बोलाएको छ ।

यसअघि असैन्यीकृत क्षेत्र (डिएमजेड) मा बारुदी सुरुङ विस्फोट हुँदा दक्षिण कोरियाका तीन सैनिक घाइते भएका थिए । दक्षिण कोरिया र संयुक्त राष्ट्रसङ्घको संयुक्त अनुसन्धानले उक्त क्षेत्रमा उत्तर कोरियाले गत वर्ष बारुदी सुरुङ बिछ्याएको निष्कर्ष निकाले पनि प्योङयाङले त्यसलाई अस्वीकार गरेको छ । उत्तर कोरियाली नेता किम जोङ–उनकी बहिनी किम यो जोङले दक्षिण कोरियाले माफी माग्नुपर्ने मागलाई ‘घृणित’ भन्दै दक्षिण कोरियाबाट प्राप्त चिकित्सा उपकरण सहयोगको प्रस्तावसमेत अस्वीकार गर्नुभएको छ ।

अक्टोबर ३ मा उत्तर कोरियाले मध्यम दूरीको ब्यालेस्टिक मिसाइल परीक्षण गरेको थियो । उक्त मिसाइलमा कृत्रिम बौद्धिकता प्रविधि प्रयोग गरिएको र त्यसले कम उचाइमा उडानको मार्ग परिवर्तन गर्न सक्ने किम यो जोङले बताउनुभएको थियो । त्यसको केही दिनपछि दक्षिण कोरियाले पनि स्वदेशमै विकसित हाइपरसोनिक ग्लाइड भेहिकलको सफल परीक्षण गरेको जनाएको थियो । दक्षिण कोरियाको राष्ट्रपति कार्यालयले उक्त हतियारले कोरियाली प्रायद्वीपका प्रमुख सैन्य लक्ष्यमा प्रहार गर्न सक्ने जनाएको छ ।

किम यो जोङले उत्तर र दक्षिण कोरियाबीच सम्बन्ध सुधार गर्न सियोलले उत्तर कोरियाप्रति सम्मान र इमानदारी देखाउनुपर्ने बताउनुभएको थियो । अमेरिकी राष्ट्रपति डोनाल्ड ट्रम्पले उत्तर कोरियाली नेता किम जोङ–उनसँग भेट गर्ने सम्भावना व्यक्त गर्नुभएपछि दक्षिण कोरिया सम्भावित आणविक वार्तामा किनारामा पर्न सक्ने चिन्तासमेत बढेको छ । ट्रम्पको भेटसम्बन्धी प्रस्ताव आएको भोलिपल्ट उत्तर कोरियाले छोटो दूरीका धेरै ब्यालेस्टिक मिसाइल प्रहार गरेको थियो ।

कोरियाली युद्ध सन् १९५३ मा शान्ति सन्धिको सट्टा युद्धविराममा टुङ्गिएकाले दुवै देश प्राविधिक रूपमा अझै युद्धकै अवस्थामा छन् । डिएमजेडमा हुने यस्ता घटनाले दुई देशबीचको तनाव बारम्बार बढाउँदै आएका छन् ।