भरतपुर । किसानले बजारमा ल्याउने तरकारीमा विषादी बढी हुन थालेपछि परीक्षण बढाइएको छ । यससँगै किसानले विषादी प्रयोग गरेलगत्तै बजारमा बिक्री गर्ने क्रम घटाएको पाइएको हो ।
यहाँ रहेको विषादी अवशेष द्रुत परीक्षण प्रयोगशालामा वार्षिक रूपमा तरकारी परीक्षण दर बढ्दै गएको छ । तरकारीमा विषादीको प्रयोग बढ्न थालेसँगै परीक्षणलाई तीव्र पारिएको हो ।
भरतपुर महानगरपालिका–२ क्षेत्रपुरमा रहेको महानगर तरकारी तथा फलफूल थोकबजार परिसरमा रहेको सो प्रयोगशालामा गत आर्थिक वर्षमा मात्र एक हजार एक सय ७२ ओटा नमुनाको परीक्षण गरिएको थियो ।
सो परिसरमा आएका चितवनसहित जुनसुकै जिल्लाका तरकारीको नमुना लिई विषादी परीक्षण गर्ने गरिएको कृषि विकास कार्यालय चितवनका प्रमुख झलकनाथ कँडेलले जानकारी दिए । उनका अनुसार गत आवमा गरिएको परीक्षणका क्रममा ३५ प्रतिशतभन्दा कम विषादी भएका (उपभोग्य) एक हजार एक सय ५८ नमुना छन् । त्यस्तै, १० ओटा नमुना ३५ देखि ४५ प्रतिशत विषादी प्रयोग भएको पाइएको छ ।
यस्ता नमुनालाई उपभोग गर्न केही दिन पर्खनुपर्ने हुन्छ । चारोटा नमुना ४५ प्रतिशतभन्दा बढी विषादी देखिएपछि विर्सजन गरिएको उनले जानकारी दिए । ४५ प्रतिशतभन्दा बढी विषादी देखिएका तरकारी विक्रीवितरण गर्दा उपभोक्ताको स्वास्थ्यमा नराम्रो असर पर्ने हुँदा ती नमुनासहित सो नमुना सङ्कलन गरिएका ठाउँको तरकारी विर्सजन गरिएको हो ।
आव २०८१/८२ मा प्रयोगशालाले नौ सय सात तरकारीका नमुनाको परीक्षण गरिएको थियो । त्यसमा विर्सजन गर्नुपर्ने पाँचोटा, केही दिनपछि उपभोग गर्न सकिने आठोटा र उपभोग गर्न सकिने आठ सय ९४ ओटा नमुना रहेका थिए ।
त्यस्तै आव २०८०/८१ मा पाँच सय ९० नमुनाको परीक्षण गरिएको थियो । चारोटा नमुना विर्सजन गर्नुपर्ने, नौओटा केही दिन राखेर मात्र प्रयोग गर्नुपर्ने र पाँच सय ७७ ओटा नमुना उपभोग्य भेटिएको थियो ।
यस प्रयोगशालामा गोलभेडा, तनेबोडी, सिमी, भान्टा, भेडेखुर्सानी, काउली, बन्दा, करेला, काँक्रो, साग, घ्युसिमीलगायत तरकारीको तथा फलपूmलमा बढी मात्रामा विषादी परीक्षण गर्ने गरिन्छ ।
कँडेलका अनुसार परीक्षण हुने भएपछि किसानले विषादी प्रयोग गरेलगत्तै बिक्री गर्न ल्याउने क्रम घटेको छ । किसानलाई विषादी प्रयोग गरेसँगै मानव स्वास्थ्यमा असर पर्ने गरी बजारमा नल्याउन सचेतना जगाइएको उनले जानकारी दिए ।
