काठमाडौँ । तेजपाल केसीको निधनप्रति नेकपा (मसाल) ले श्रद्धाञ्जली व्यक्त गरेको छ ।
महामन्त्री मोहनविक्रम सिंहको हस्ताक्षरमा २०८३ भदौ १८ गते बिहीबार शोकवक्तव्य जारी गर्दै मसालले केसीप्रति श्रद्धाञ्जली तथा सन्तप्त परिवारप्रति समवेदना व्यक्त गरेको हो ।
वक्तव्यका अनुसार उहाँको नागरिकतामा नाम तेजबहादुर खत्री थियो भने पार्टीभित्र उहाँको टेकनाम क. रमेश रहेको थियो ।
गत भदौ ४ गते देहान्त भएका केसी मूल प्रवाह अखिल भारत नेपाली एकता समाजको विभिन्न समितिमा रहेर काम गर्नुभएको थियो ।
पछिल्लो समयमा उहाँ बाँकेको नेपालगञ्जमा बसोवास गर्दै आउनुभएको थियो ।
केसीको निधनबाट पार्टीको आन्दोलनलाई क्षति पुगेको बताइएको सो वक्तव्यको पूर्ण पाठ यस्तो छ :
“बाँके जिल्ला नेपालगञ्ज उपमहानगरपालिका–१८ निवासी कामरेड तेजबहादुर खत्री (का. रमेश) को २०८३ भदौ ४ गते ६९ वर्षको उमेरमा मृत्यु भएको छ । हामीले उहाँको मृत्युप्रति गहिरो दु:ख व्यक्त गर्दै सन्तप्त परिवारजनप्रति हार्दिक समवेदना तथा सहानुभूति प्रकट गर्दछौँ ।
कामरेड तेजबहादुर खत्री हाम्रो पार्टीको इमान्दार, कर्तव्यनिष्ठ, अनुशासित र स्वच्छ छवि भएको सदस्य हुनुहुन्थ्यो । उहाँले मूल प्रवाह अखिल भारत नेपाली एकता समाजमा आबद्ध भएर आफ्नो राजनीतिक तथा सामाजिक जीवनको सुरुआत गर्नुभएको थियो । उहाँले हाम्रो पार्टीका विभिन्न जनवर्गीय सङ्गठन र पार्टीका विभिन्न तहमा रहेर काम गर्नुभएको थियो । उहाँको मृत्युबाट हाम्रो पार्टीको आन्दोलनमा गम्भीर क्षति पुगेको छ ।
अन्तमा हामीले कामरेड तेजबहादुर खत्रीप्रति हार्दिक श्रद्धाञ्जली व्यक्त गर्दछौँ ।”
