नयाँ दिल्ली । मूल प्रवाह अखिल भारत नेपाली एकता समाजले सहिद सरोज शर्मा (शोभाखर धनञ्जय)को ४०औँ स्मृति दिवसका अवसरमा उहाँप्रति श्रद्धाञ्जली अर्पण गरेको छ ।
समाजका केन्द्रीय अध्यक्ष प्रेम पौडेलद्वारा २७ अगस्ट २०२६ मा जारी प्रेस वक्तव्यमा शर्मालाई जुझारु, अनुशासित, कर्तव्यनिष्ठ र दृढनिश्चयी नेता भएको उल्लेख गर्दै पञ्चायती निरङ्कुश व्यवस्थाविरुद्ध उहाँले वैचारिक तथा सङ्गठनात्मक क्षेत्रमा महत्वपूर्ण योगदान दिएको जनाइएको छ । पञ्चायती चुनाव बहिष्कारको समर्थनमा १२ मे १९८६ मा दिल्लीमा आयोजित प्रदर्शनमा गिरफ्तार हुने ९६ जनामध्ये शर्मा पनि एक हुनुहुन्थ्यो ।
वक्तव्यअनुसार, मूल प्रवाह अखिल भारत नेपाली एकता समाजको मासिक बुलेटिन ‘नेपाली एकता’का सहसम्पादकसमेत रहेका शर्माको २०४३ साल भदौ ११ गते नयाँ दिल्लीको बेलारोडमा पत्रिका बिक्री–वितरणका क्रममा हत्या भएको थियो ।
सङ्गठनले सहिदहरूको बलिदानबाट प्राप्त लोकतान्त्रिक अधिकारको रक्षा गर्दै क्रान्तिकारी आन्दोलनलाई अगाडि बढाउनु आवश्यक रहेको जनाएको छ । साथै, श्रमजीवी वर्गको विचारको रक्षा, सही कार्यदिशा र सङ्गठनलाई सबैखाले भड्कावबाट जोगाउँदै आफ्नो क्रान्तिकारी अभिभारा पूरा गर्ने प्रतिबद्धता व्यक्त गरेको छ ।
वक्तव्यमा अध्यक्ष प्रेम पौडेलले सहिद सरोज शर्माका सपना निरन्तर क्रान्ति अभियानमा जीवित रहने र उहाँको योगदान सदा स्मरण गरिने बताउनु भएको छ ।
