काठमाडौँ । अखिल नेपाल महिला सङ्घले बाराकी तीन वर्षीया गरिमा चौधरीको चीत्कार सिङ्गो समाजअगाडिको प्रश्न भएको विचार व्यक्त गरेको छ ।
अध्यक्ष मीना पुनको हस्ताक्षरमा २०८३ भदौ ६ गते शनिबार प्रेसवक्तव्य जारी गर्दै महिला सङ्घले सो धारणा व्यक्त गरेको हो ।
“गरिमाको चीत्कार अब केवल एउटा परिवारको पीडा होइन, यो सिङ्गो समाजको सामु खडा भएको प्रश्न हो” महिला सङ्घले माग गरेको छ– “बालिका तथा महिलामाथिको हिंसा अन्त्य गर्न राज्य गम्भीर बनोस् र पीडित परिवारलाई शीघ्र न्याय सुनिश्चित गरियोस् ।”
घटनाको निष्पक्ष र गहन छानबिन गरी अपराधीलाई कुनै बहानामा उन्मुक्ति नदिन आग्रह गरिएको उक्त प्रेसवक्तव्यको अन्तमा मृतक गरिमाप्रति भावपूर्ण श्रद्धाञ्जली तथा शोकसन्तप्त परिवारप्रति समवेदना व्यक्त गरिएको छ ।
यस्तो छ, वक्तव्यको पूर्ण पाठ :
“बाराकी तीन वर्षीया अबोध बालिका गरिमा चौधरीलाई बलात्कारपछि निर्मम र क्रुरतापूर्वक गरिएको हत्याको घटनाले सिङ्गो मानव समाज स्तब्ध र शोकाकुल बनेको छ । कलिलो उमेरमै उनको जीवनमाथि गरिएको यो क्रुर प्रहार सभ्य समाजकै लागि कलङ्क हो ।
अखिल नेपाल महिला सङ्घ यस अमानवीय र आपरािधक घटनाको घोर निन्दा तथा भत्र्सना गर्दछ । यस प्रकारको जघन्य अपराधको जति नै विरोध गरे पनि कमी हुन्छ । अपराधीलाई कुनै पनि बहानामा उन्मुक्ति दिनुहुँदैन । घटनाको निष्पक्ष र गहन अनुसन्धान गरी दोषीलाई कडाभन्दा कडा कारबाही गर्न जोडदार माग गर्दछौँ । पीडित परिवारलाई शीघ्र न्याय र उचित क्षतिपूर्ति सुनिश्चित गरियोस् ।
बालिका हराएको सूचना समयमै प्राप्त हुँदासमेत खोजीकार्यमा कुनै कमजोरी वा लापरबाही भएको भए त्यसको समेत निष्पक्ष छानबिन गरी सम्बन्धित दोषी तथा जिम्मेवार व्यक्तिमाथि कानुनबमोजिम कारबाही गरियोस् ।
गरिमाको चीत्कार अब केवल एउटा परिवारको पीडा होइन, यो सिङ्गो समाजको सामु खडा भएको प्रश्न हो । बालिका तथा महिलामाथिको हिंसा अन्त्य गर्न राज्य गम्भीर बनोस् र पीडित परिवारलाई शीघ्र न्याय सुनिश्चित गरियोस् ।
अन्त्यमा अबोध बालिका गरिमा चौधरीप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनप्रति गहिरो समवेदना व्यक्त गर्दछौँ ।
गरिमालाई न्याय देऊ !
महिला तथा बालिकामाथिको हिंसा अन्त्य गर !
दोषीलाई हदभन्दा हदसम्मको कठोर कारबाही गर !”