काठमाडौँ । वर्षायाम सुरु भएसँगै नेपाली वनजंगलमा प्राकृतिक रूपमा उम्रिने भुड्की (पड्के/फुट्की) च्याउ बजारमा आकर्षणको केन्द्र बनेको छ । साल, चिलाउने र कटुसका जंगलमा प्राकृतिक रूपमा उम्रिने यो च्याउ सीमित समय र सीमित मात्रामा मात्र पाइने भएकाले यसको मूल्य प्रतिकिलो २,००० देखि २,५०० रुपैयाँसम्म पुगेको छ, जुन खसीको मासुभन्दा पनि महँगो पर्छ।
विशिष्ट स्वाद, प्राकृतिक सुगन्ध र रेसादार बनावटका कारण भुड्की च्याउका पारखीहरू महँगो मूल्य तिर्नसमेत तयार हुने गरेका छन् । व्यावसायिक रूपमा उत्पादन गर्न नसकिने र वर्षायाममा मात्र जंगलमा उम्रिने भएकाले यसको उपलब्धता सीमित छ। सङ्कलनका लागि वनजंगल चहार्नुपर्ने, श्रम र जोखिम बेहोर्नुपर्ने तथा ढुवानी लागतसमेत जोडिने भएकाले यसको मूल्य उच्च रहने गरेको छ।
दुर्लभता, स्वाद र सीमित उपलब्धताका कारण भुड्की च्याउको माग वर्षेनी बढ्दै गएको देखिन्छ।
पोषणका दृष्टिले पनि च्याउ प्रोटिन, फाइबर, भिटामिन र खनिजको राम्रो स्रोत मानिन्छ। तर, जंगली च्याउ सेवन गर्दा प्रजातिको सही पहिचान गर्नुपर्ने विज्ञहरूले सुझाव दिएका छन्, किनकि सबै जंगली च्याउ खानयोग्य हुँदैनन्।
