सन् २००७ मा अर्जेन्टिनाका युवा स्टार फुटबलर लियोनेल मेसीले बार्सिलोनाको क्याम्प नोउस्थित ड्रेसिङ रुममा युनिसेफको च्यारिटी क्यालेन्डरका लागि एक सानो बालकसँग फोटोसुट गरेका थिए। त्यतिबेला २० वर्षीय मेसी विश्व फुटबलका उदाउँदा प्रतिभा थिए र भविष्यका महान् खेलाडी बन्ने यात्रामा थिए।
त्यो बेला कसैले पनि अनुमान गर्न सकेको थिएन कि मेसीको काखमा रहेको ती बालक भविष्यमा विश्व फुटबलकै अर्को चर्चित नाम बन्नेछन्। ती बालक अहिले स्पेनका युवा स्टार लमिन यामाल हुन्।
करिब १६ वर्षपछि सो तस्बिर सामाजिक सञ्जालमा भाइरल बनेको छ। हालै सम्पन्न युरो च्याम्पियनसिपमा उत्कृष्ट प्रदर्शन गरेका यामालले सेमिफाइनलमा फ्रान्सविरुद्ध गरेको शानदार गोलले विश्वभर चर्चा बटुलेको थियो। उनले १६ वर्ष ३६२ दिनको उमेरमा युरो कपको इतिहासमै सबैभन्दा कम उमेरमा गोल गर्ने खेलाडीको कीर्तिमान पनि कायम गरेका छन्।
मेसी र बेबी यमालको वर्ष 2007 को तस्वीर
यो ऐतिहासिक तस्बिर यामालका बुबाले इन्स्टाग्राममा सार्वजनिक गर्दै “दुई महान् व्यक्तिको सुरुवात” भन्ने क्याप्सन लेखेका थिए।
तस्बिर एसोसिएटेड प्रेसका स्वतन्त्र फोटोग्राफर जोआन मोनफोर्टले खिचेका हुन् । उनका अनुसार उक्त फोटोसुट युनिसेफले स्पेनको मातारो क्षेत्रमा आयोजना गरेको च्यारिटी कार्यक्रमका क्रममा भएको थियो। यामालको परिवार सो कार्यक्रममा सहभागी भएको थियो ।
मोनफोर्टका अनुसार फोटोसुट सहज थिएन, किनभने मेसी स्वभावैले निकै लजालु थिए । उनी गल्तीवश अर्को ड्रेसिङ रुममा पुगेका थिए, जहाँ पानीले भरिएको प्लास्टिकको टबमा सानो बालक यामाल थिए। सुरुमा मेसीलाई बालकलाई कसरी समात्ने भन्ने पनि अन्योल भएको उनले सम्झिएका छन्।
उक्त अवसरका केही तस्बिरमा यामालकी आमा पनि मेसीसँग देखिएकी छन्।
संयोगवश, मेसीले जस्तै यामालले पनि बार्सिलोना क्लबबाट व्यावसायिक फुटबल यात्रा सुरु गरेका छन्। उनले क्लबका लागि सबैभन्दा कम उमेरमा गोल गर्ने खेलाडीको कीर्तिमान बनाएका छन् भने स्पेनिस ला लिगामा पनि सबैभन्दा कम उमेरमा गोल गर्ने खेलाडी बनेका छन्।
मोनफोर्टले भने, “यो तस्बिर भाइरल भएपछि मात्रै मलाई मेसीको काखमा रहेको बालक लमिन यामाल भएको थाहा भयो। अहिले यो ऐतिहासिक क्षणसँग जोडिन पाउँदा निकै रोमाञ्चक र सुखद अनुभूति भइरहेको छ।”
