काठमाडौँ, असार ४। फिफा विश्वकप फुटबल प्रतियोगिताअन्तर्गत आज भएको खेलमा इंग्ल्यान्डले क्रोएसियामाथि ४–२ गोलको शानदार जित दर्ता गरेको छ। अमेरिकाको डालासस्थित रंगशालामा भएको खेलमा इंग्ल्यान्डले उत्कृष्ट प्रदर्शन गर्दै महत्वपूर्ण तीन अंक हात पारेको हो।
खेलको १२औँ मिनेटमा कप्तान ह्यारी केनले पेनाल्टीमार्फत गोल गर्दै इंग्ल्यान्डलाई सुरुआती अग्रता दिलाएका थिए। तर ३६औँ मिनेटमा क्रोएसियाका मार्टिन बटुरिनाले गोल गर्दै खेललाई १–१ को बराबरीमा पुर्याए।
त्यसपछि ४२औँ मिनेटमा ह्यारी केनले व्यक्तिगत दोस्रो गोल गर्दै इंग्ल्यान्डलाई पुनः अग्रता दिलाए। पहिलो हाफको अतिरिक्त समयमा क्रोएसियाका पिटर मुसाले गोल गर्दै खेललाई फेरि २–२ को बराबरीमा ल्याए।
दोस्रो हाफको सुरुआतमै, ४७औँ मिनेटमा जुड बेलिङ्हमले गोल गरेपछि इंग्ल्यान्डले ३–२ को अग्रता बनायो। खेलको ८५औँ मिनेटमा मार्कस रासफोर्डले अर्को गोल थपेपछि इंग्ल्यान्डले अग्रता दोब्बर बनाउँदै ४–२ को जित सुनिश्चित गर्यो।
यस जितसँगै इंग्ल्यान्डले प्रतियोगितामा महत्वपूर्ण सफलता हासिल गरेको छ।
पोर्चुगल र कंगो बराबरीमा
फिफा विश्वकप फुटबल प्रतियोगिताको समूह ‘एल’अन्तर्गतको आज भएको खेलमा पोर्चुगल र कंगोको खेल बराबरीमा टुंगिएको छ ।
अमेरिकाको ह्युस्टन रंगशालामा भएको खेलमा दुवै टोलीले १–१ गोल गरेपछि खेल बराबरीमा टुंगिएको हो । खेलको छैटौँ मिनेटमा जुआँ नेभेसले गोल गर्दै पोर्चुगललाई सुरुआती अग्रता दिलाएका थिए । पहिलो हाफको अधिंकाश समय बल पोर्चुगलले नियन्त्रणमा राखेको थियो ।
तर पहिलो हाफमा थपिएको चार मिनेटको अतिरिक्त समयको अन्तिम क्षणमा कंगोका लागि योआने विस्साले कर्नरबाट आएको बललाई हेडमार्फत चाली चुमाएपछि खेल बराबरीमा पुग्यो । दोस्रो हाफमा दुवै टोलीबाट कुनै पनि गोल हुन सकेन ।
कालेब यिरेनकीको गोलमा घाना विजयी
क्यानडाको टोरन्टो स्टेडियममा भर्खरै सम्पन्न खेलमा घानाले पानामालाई १–० गोलअन्तरले पराजित गर्दै जित हासिल गरेको हो । कालेब यिरेनकीले गरेको एक गोल नै घानाको लागि निर्णायक गोल सावित भयो । उनले खेलको दोस्रो हाफको अतिरिक्त समयमा गोल गरे । यस जितसँगै घानाले शीर्ष तीन अङ्क जोडेको छ ।
समूह ‘एल’ मा तीन अङ्क जोडेको इङ्ग्यान्ड शीर्ष स्थानमा छ । समान तीन अङ्क नै बटुलेको घाना दोस्रो स्थानमा छ । अङ्कविहीन रहेका पानामा र क्रोएसिया तेस्रो र चौथो स्थानमा छन् । विश्वकपअन्तर्गत समूह ‘के’ को खेलमा अहिले नेपाली समयअनुसार ७ः४५ बजे उज्वेकिस्तान र कोलोम्बियाबीच प्रतिस्पर्धा हुँदैछ ।
आजका अन्य खेल
बिहान ७ः४५ बजे उज्बेकिस्तान र कोलम्बियाबीच प्रतिस्पर्धा हुनेछ।
