टेकराज भुसाल, सन्धिखर्क ।
खेलकुदको विकास, युवाको पहिचान स्थापित गर्ने तथा स्वस्थ जीवनशैली प्रवद्र्धन गर्ने उद्देश्यले महादेव फार्मेसी धारापानीको आयोजनामा भूमिकास्थान नगरपालिका–४ मर्दिनडाँडामा सम्पन्न खुल्ला पुरुष भलिबल प्रतियोगिताको उपाधि घोरबन्दा युवा क्लब शीतगङ्गाले जितेको छ ।
प्रतियोगिताको २०८३ जेठ २३ गते शनिबार भूमिकास्थान नगरपालिकाका नगरप्रमुख झविलाल थापाले उद्घाटन गर्नुभएको थियो ।
प्रतियोगिताको फाइनल खेलमा घोरबन्दा युवा क्लब शीतगङ्गाले आयोजक महादेव फार्मेसी धारापानीलाई ३–० को सोझो सेटमा पराजित गर्दै उपाधिमाथि कब्जा जमाएको थियो ।
उत्कृष्ट प्रदर्शन गर्दै फाइनलमा दबाबपूर्ण खेल खेलेको शीतगङ्गा टोलीले सुरुदेखि नै खेलमा वर्चस्व कायम राख्दै विजेता बन्न सफल भएको थियो ।
उपाधिसँगै घोरबन्दा युवा क्लब शीतगङ्गाले नगद ५० हजार रुपैयाँ, सिल्ड, मेडल तथा प्रमाणपत्र प्राप्त गरेको छ । उपविजेता बनेको आयोजक महादेव फार्मेसी धारापानीले ३० हजार रुपैयाँ नगदसहित सिल्ड, मेडल र प्रमाणपत्रमा चित्त बुझाएको छ ।
त्यस्तै थ्री स्टार युवा क्लब भूमिकास्थान तृतीय हुँदै २० हजार रुपैयाँ नगद पुरस्कारसहित सिल्ड, मेडल र प्रमाणपत्र प्राप्त गर्न सफल भएको छ भने भगवती युवा क्लब सन्धिखर्कले सान्त्वना स्थान हासिल गर्दै १० हजार रुपैयाँ नगदसहित सिल्ड, मेडल र प्रमाणपत्र प्राप्त गरेको छ ।
प्रतियोगितामा विभिन्न क्षेत्रका आठ टोलीको सहभागिता रहेको थियो । प्रतियोगितामार्फत स्थानीय स्तरका खेलाडीलाई आफ्नो प्रतिभा प्रदर्शन गर्ने अवसर प्राप्त भएको आयोजकले जनाएको छ ।
