रामप्रकाश पुरी ##
राष्ट्रिय स्वतन्त्र पार्टीले झन्डै दुईतिहाइ बहुमत ल्याएपछि देशको सुशासन, राष्ट्रियता, नेपालको अन्तर्राष्ट्रिय सम्बन्ध, भ्रष्टाचारको नियन्त्रण, गणतन्त्र, धर्मनिरपेक्षता, जनताका विभिन्न आन्दोलन र सङ्घर्षका ऐतिहासिक उपलब्धिजस्ता विषयमा विभिन्न परिचर्चा भइरहेका छन् ।
पहिलो कुरा, राष्ट्रिय स्वतन्त्र पार्टीको आन्दोलन, सङ्घर्ष र योगदानको कुनै ऐतिहासिक पृष्ठभूमि नभएकाले त्यसले देशमा सुशासन दिन सक्छ वा सक्दैन भन्ने प्रश्न उठ्नु स्वाभाविक छ । त्यसले कुनै आन्दोलन, सङ्घर्ष र योगदान गर्ने ऐतिहासिक कार्य नगरेकाले र ऐतिहासिक पृष्ठभूमि पनि नभएकाले त्यसको प्रशासनबारे विचार गर्न अहिलेको अवस्थामा कठिन हुन्छ । त्यो पार्टीको कुनै दार्शनिक, सैद्धान्तिक वा वैचारिकताको निश्चित आधार नभएकाले त्यसले भविष्यमा के कस्ता गतिविधि गर्नेछ ? त्यसबारे भविष्यमा छिट्टै थाहा हुनेछ ।
दोस्रो कुरा, राष्ट्रिय स्वतन्त्र पार्टीका उच्च नेताको आचरण, छवि र व्यवहारबारे धेरै नै प्रश्न उठ्ने गरेका छन् । सहकारी ठगीलगायतका काण्डका मुद्दा अदालतमा रहेका छन् । उनीहरूले अहिले चुनावमा विजय हासिल गरेपछि देशमा सुशासन कायम गर्न सबै प्रकारको भ्रष्टाचारको अन्त्य गर्नेछन् वा आफ्नो पक्षको बचाउ गरेर कुशासनलाई नै निरन्तरता दिनेछन् ? त्यो पनि भविष्यमा छिट्टै नै सतहमा आउनेछ ।
तेस्रो कुरा राष्ट्रिय स्वतन्त्र पार्टीले अहिलेसम्म वैदेशिक हस्तक्षेप र चलखेलबारे कुनै विचार राखेको पाइदैन । त्यसले एमसिसी, लिपुलेक, विभिन्न समयमा भएका असमान सन्धिसम्झौताबारे कुनै विचार राखेको छैन । त्यसले त्यसको साम्राज्यवादी एजेन्टको चरित्रलाई उजागर गर्दछ । नागरिकता, एमसिसी र लिपुलेकको विषयलाई लिएर नेपाली जनताले लगातार सङ्घर्ष गर्दै आएका छन् । अब स्वतन्त्र पार्टीले नेपाली जनताका ती आवाजको प्रतिनिधित्व गरेर काम गर्नेछ वा अमेरिकी र भारतीय दलाल भएर ? त्यसको पनि परीक्षा हुनेछ ।
उपर्युक्त पक्षमाथि विचार गर्दा राष्ट्रिय स्वतन्त्र पार्टी एउटा दिशाविहीन जमात हो, जसले आफ्नो दिशा निश्चित गर्न कैयौँ परीक्षा पास गर्नुपर्ने आवश्यकता हुनेछ । उक्त पार्टीले अहिलेकै अवस्थामा देशको शासन चलाउँदै गयो भने देशमा अराजकता, गालीगलौजको राजनीतिको व्यापकता, राष्ट्रियता धर्मराउने, विदेशी साम्राज्यवादीले आफ्नो स्वार्थ पूरा गर्नेछ र देशको भविष्यमा गम्भीर प्रश्न खडा हुने निश्चित छ ।
अहिले राजावादीले राष्ट्रिय स्वतन्त्र पार्टीले यदि धर्मनिरपेक्षतालाई खारेर गरेर हिन्दु राष्ट्र स्वीकार गरेमा आफूहरूको समर्थन रहने र त्यसका लागि संसद्मा दुईतिहाइ बहुमत पुर्याउनका लागि सहयोग गर्ने बताउन थालेका छन् । राजावादीले तथाकथित राष्ट्रियताको कवचभित्र लुकेर गणतन्त्र र धर्मनिरपेक्षताका विरुद्ध आक्रमण गर्दै आएका छन् । अब उनीहरूले स्वतन्त्र पार्टीजस्तो सङ्गठनको माध्यमबाट जनताका आन्दोलन, सङ्घर्ष र बलिदानबाट प्राप्त भएका ऐतिहासिक उपलब्धिलाई समाप्त पार्ने वा संसद्मा दुईतिहाइ बहुमत पुर्याएर संविधान नै बदल्ने प्रयत्न गर्नेछन् । उनीहरूको त्यो प्रयत्न पूरा भएमा देश झन् झन् प्रतिगमनतिर जानेछ र त्यसले देशको अवस्थालाई झन् जटिल बनाउनेछ ।
राष्ट्रियता, गणतन्त्र र धर्मनिरपेक्षताको रक्षा, एमसिसी, नागरिकता, लिपुलेक र विभिन्न असमान सन्धिसम्झौता देश विरुद्ध उभिएका छन् । यी मुख्य समस्याको रूपमा रहेका छन् । भविष्यमा देशको अवस्थालाई यिनै विषयप्रति अपनाइने राजनीतिले तय गर्नेछ । जनता जागरुक र सजग हुन अनिवार्य छ ।
