काठमाडौं । नेपाली कांग्रेसका पूर्व कार्यवाहक सभापति पूर्णबहादुर खड्काले कांग्रेसमा देखिएको विभाजनको अवस्थापछि संविधान निर्माणमा महत्वपूर्ण भूमिका खेलेका अन्य राजनीतिक दलहरूमा समेत विभाजनको जोखिम बढ्न सक्ने बताएका छन्।
कांग्रेस सभापति गगनकुमार थापालाई सम्बोधन गर्दै खड्काले आफ्नो ‘अन्तरमन’ले कांग्रेसको विभाजन भएको केही महिनाभित्रै नेकपा एमाले, नेपाली कम्युनिस्ट पार्टीलगायत संविधान निर्माणमा महत्वपूर्ण भूमिका खेलेका दलहरूमा समेत विभाजन हुने वा गराइने संकेत गरिरहेको बताएका हुन्।
खड्काले पछिल्ला घटनाक्रम, विभिन्न गतिविधि र ‘चलखेल’ले मुलुकको राजनीतिक अवस्था थप जटिल बन्न सक्ने संकेत गरेको दाबी गरेका छन्। यद्यपि, उनले त्यस्तो विभाजन गराउने भनिएको शक्ति वा त्यसको ठोस आधार भने सार्वजनिक रूपमा स्पष्ट गरेका छैनन्।
उनले दलहरूमा विभाजनको क्रम बढ्दै गए त्यसको असर राजनीतिक अस्थिरतामा मात्र सीमित नरही सामाजिक तनावतर्फ समेत जान सक्ने चेतावनी दिएका छन्। विशेषगरी जातीय, क्षेत्रीय र धार्मिक द्वन्द्व उत्पन्न हुन सक्ने उनको आशंका छ।
खड्काले यस्तो अवस्था आएमा गत भदौ २४ गतेको घटनाक्रमलाई समेत बिर्साउने गरी मुलुकमा गम्भीर द्वन्द्वको अवस्था सिर्जना हुन सक्ने दाबी गरेका छन्। त्यसपछि नेपालको राष्ट्रियता, भौगोलिक अखण्डता, सार्वभौमसत्ता र राष्ट्रिय स्वाभिमानमा समेत गम्भीर असर पर्न सक्ने भन्दै उनले चिन्ता व्यक्त गरेका छन्।
कांग्रेसभित्रको विभाजन रोक्न सभापति थापाले तत्काल संवाद र पहल अघि बढाउनुपर्ने खड्काको सुझाव छ। उनले पूर्वसभापति शेरबहादुर देउवासहित पार्टीका अग्रज नेताहरूसँग वार्ता–संवाद सुरु गर्न तथा आवश्यक परे महाधिवेशनको कार्यतालिकासमेत केही समय सारेर पार्टी एकताका लागि पहल गर्नुपर्ने विकल्प अघि सारेका छन्।
खड्काका अनुसार यसअघि वैशाख २१ गते आफूहरूबीच भएको संवादपछि नै निर्णय लिइएको भए जेठको पहिलो साताभित्र कांग्रेसलाई एकताबद्ध गर्न सकिने अवस्था बन्न सक्थ्यो। ढिलो भए पनि पार्टी एकताका लागि पुनः पहल गर्न उनले सभापति थापालाई आग्रह गरेका छन्।
कांग्रेसभित्र संस्थापन र विशेष महाधिवेशन पक्षबीच मतभेद बढिरहेका बेला खड्काको यस्तो धारणा सार्वजनिक भएको हो। विशेष महाधिवेशन पक्षले नेतृत्व र नीतिगत परिवर्तनको माग अघि बढाइरहेको छ भने संस्थापन पक्षले पार्टीभित्रको विवाद समाधानका लागि संवादको प्रयास गरिरहेको देखिन्छ।
खड्काले कांग्रेसको आन्तरिक विवादलाई समयमै व्यवस्थापन गर्न नसकिए त्यसको प्रभाव सिंगो राष्ट्रिय राजनीतिमा पर्न सक्ने भन्दै पार्टी एकताका लागि तत्काल राजनीतिक पहल आवश्यक रहेको बताएका छन्।
