बेइजिङ । चीनले अफगानिस्तान र पाकिस्तानबीच जारी हिंसात्मक झडप अन्त्य गर्न युद्धविरामको आह्वान गर्दै दुवै पक्षसँग संवाद गरिरहेको जनाएको छ ।
पाकिस्तानले शुक्रबार राजधानी काबुलसहित अफगानिस्तानका प्रमुख सहरमा हवाई आक्रमण गरेपछि चीनको यो प्रतिक्रिया आएको हो ।
बेइजिङले दुवै देशमा हालको द्वन्द्वले गहिरो चिन्ता उत्पन्न गरेको छ र सकेसम्म चाँडो थप रक्तपात रोक्न आवश्यक रहेको बताएको छ ।
पाकिस्तान चीनको नजिकको रणनीतिक साझेदार भए पनि बेइजिङ आफैँलाई अफगानिस्तानको मित्रवत छिमेकी मान्दछ ।
चिनियाँ विदेश मन्त्रालयकी प्रवक्ता माओ निङले शुक्रबार प्रेस ब्रिफिङमा भनिन्– ‘चीनले दुवै पक्षलाई संयम अपनाउन र शान्त रहन आह्वान गर्दछ । हामी युद्धविराम हासिल गर्न र तनाव कम गर्न रचनात्मक भूमिका निर्वाह गर्न इच्छुक छौँ ।’
यसअघि बिहीबार राति अफगान सेनाले पाकिस्तानी सीमा सेनामाथि आक्रमण गरेको थियो । पाकिस्तानका रक्षामन्त्रीले छिमेकीसँग खुला युद्ध घोषणा गरिसकेका छन् ।
विश्लेषकका अनुसार चीनले पाकिस्तानमा बेल्ट एन्ड रोड परियोजनामा दशौँ अर्ब डलर लगानी गरेको छ र तालिबानसँगको सम्बन्ध सन् २०२१ मा सत्ता फर्किएपछि अझ बलियो भएको छ ।
माओ निङका अनुसार चीनले दुवै देशका चिनियाँ नागरिक, परियोजना र संस्थाको सुरक्षा सुनिश्चित गर्न अनुरोध गरेको छ र आवश्यक परे सहयोग उपलब्ध गराउने तयारीमा रहेको छ ।
बेइजिङले स्थितिलाई नजिकबाट निगरानी गरिरहेको र कुनै पनि नागरिकलाई सुरक्षित राख्ने प्रतिबद्धता जनाएको छ । (रासस/एएफपी)
