काठमाडौं । राष्ट्रिय खेलकुद परिषद (राखेप) सदस्य सचिवका लागि निवर्तमान सदस्यसचिव रमेश सिलवालसहित ११ जनाले आवेदन दिएका छन् ।
खेलकुद मन्त्रालय स्रोतका अनुुसार बिहीबार बिहानसम्म खेलकुद मन्त्रालयमा सदस्य–सचिवका लागि ११ जनाको दर्खास्त परेको छ । दरखास्त दिने अन्तिम दिन आज (बिहीबार) कार्यालय समयसम्म दर्खास्त दिन पाइने छ ।
आवेदनमा पूर्व भलिबल खेलाडी नीलम वज्राचार्य समेत रहेका छन् । त्यस्तै बडिविल्डिङ संघमा आबद्ध रोशन महर्जनले पनि आवेदन दिएका छन् भने एथ्लेटिक्स संघमा आबद्ध रविराज चण्डिकारले पनि सदस्यसचिवका लागि आवेदन दिएका छन् ।
आवेदन दिनेमा अनिल अधिकारी, हर्कबहादुर राई, मीना श्रेष्ठ, शिवराज भट्ट, नीलबहादुर थापा, अछुतम लामिछाने र मेगराज पौड्याल रहेका छन् ।
सदस्यसचिव पदको सिफारिसका लागि गत शुक्रबार मन्त्रालयले तीन सदस्यीय समिति गठन गर्दै दरखास्त आह्वान गरेको थियो । नयाँ खेलकुद विकास ऐन असार १७ गतेबाट लागु भएसँगै राखेपको सदस्यसचिव पद रिक्त रहेको छ ।
अब उम्मेदवारले प्रस्तुत गरेको कार्ययोजनाको अध्ययन गर्दै सिफारिस समितिले एक महिलासहित तीन जनाको नाम खेलकुद मन्त्रीसमक्ष प्रस्ताव गर्नेछ । सोही सिफारिस नामावलीलाई खेलकुद मन्त्रीले मन्त्रिपरिषदबाट पास गराउनेछन् ।
खेलकुद विकास ऐन कार्यान्वयनमा आएसँगै पहिलो पटक खुला प्रतिस्पर्धाबाट सदस्यसचिव छनोट गर्न लागिएको हो ।
निवर्तमान सदस्यसचिव सिलवालले पनि आवेदन दिएकाले उनैलाई पुनः ल्याइने सम्भावना रहेको स्रोतले जनाएको छ । सिलवाल प्रधानमन्त्री ओली निकट हुनुका साथै छोटो कार्यकालमा तेह्रौं साग सफलतापूर्वक सम्पन्न गरेको श्रेय पनि उनलाई छ ।
