सिमरा । बारा जिल्ला प्रशासन कार्यालयले सिमरामा आज पनि कफ्र्यु लगाएसँगै अशान्त बनेको छ । हिजो मङ्सिर ३ गते प्रदर्शनकारी जेनजी युवा र प्रहरीबिच झडप भएपछि प्रशासनले कफ्र्यू जारी गरेको हो ।
अहिले १ बजेदेखि बेलुका ८ बजेसम्मका लागि कफ्र्यू आदेश जारी गरिएको जिल्ला प्रशासन कार्यालयले जनाएको छ ।
वीरगञ्ज पथलैया सडकखण्डको पथलैयाचोक दक्षिणदेखि जितपुर लल्कापुलसम्म राजमार्गको दायाबाया पाँच सय मिटर र सिमरा विमानस्थलको पाँच सय मिटर क्षेत्रमा कफ्र्यू लगाइएको छ ।
स्थानीय प्रशासन ऐन २०२८ को दफा ६ (क) र (ख) अनुसार ती स्थानमा आवतजावत गर्न, कुनै पनि प्रकारको भेला, जुलुस, प्रदर्शन, सभा, बैठक, घेराउ गर्न नपाउने जिल्ला प्रशासनद्वारा जारी आदेशमा उल्लेख छ ।
जेनजीका अगुवालाई कुटपिट गर्ने एमालेको भ्रातृ सङ्गठन युवा सङ्घका कार्यकर्तालाई कारबाहीको माग राख्दै उनीहरूले बिहीबार पनि प्रदर्शन गरेका थिए ।
युवाहरूले सिमरा चोकमा प्रदर्शन गरेपछि त्रिभुवन राजपथको वीरगञ्ज पथलैयाखण्डमा यातायात अवरुद्ध छ । सिमरा बजारका पसल तथा व्यवसाय बन्द छन् ।
उनीहरूले बुधबार शान्तिपूर्ण विरोध प्रदर्शनका क्रममा आफूमाथि आक्रमण गर्ने एमाले नेतामाथि कडा कारबाहीको माग गरेका छन् ।
उनीहरूले सिमरा उपमहानगरपालिका–१ का तारा बस्नेतसहितका व्यक्तिलाई विपक्षी बनाउँदै इलाका प्रहरी कार्यालय सिमरामा किटानी जाहेरीसमेत दर्ता गराएका थिए ।
जेनजी अगुवा सम्राट उपाध्यायले सामाजिक सञ्जाल फेसबुकमा भिडियो सन्देश राखेर शान्तिपूर्ण प्रदर्शन गरिरहेका आफूलगायत जेनजी युवा साथीलाई कुटपिट गर्नेलाई बिहान १० बजेसम्म कारबाही नगरेको खण्डमा प्रदर्शन गर्ने चेतावनी दिएका थिए ।
बुधबार दिउँसो प्रदर्शनका क्रममा एमालेका कार्यकर्ता र जेनजी युवाबिच झडप भएको थियो । त्यसको विरोधमा उनीहरूले सिमरा
विमानस्थल अगाडि प्रदर्शन गरेका थिए । त्यस क्रममा प्रहरीले लाठीचार्ज गरेपछि प्रदर्शनकारी र प्रहरीबिच झडप भएको थियो ।
प्रदर्शनकारीले प्रहरीमाथि ढुङ्गा हान्नुका साथै विमानस्थलको गेटमा तोडफोड गरेका थिए ।
स्थिति नियन्त्रणमा लिन प्रहरीले अश्रुग्यास प्रहार गरेको थियो भने जिल्ला प्रशासनले दिउँसो १२:३० देखि साँझ ८ बजेसम्म कफ्र्यू जारी गरेको थियो ।
जाहेरी दरखास्तमा किटानी नाम उल्लेख भएकामध्ये जितपुर सिमरा उपमहानगरपालिका वडा नं. २ बस्ने धनबहादुर श्रेष्ठ र वडा नं. ६ बस्ने कैमुद्धिन अन्सारीलाई पक्राउ गरिएको प्रहरीले जनाएको छ ।
