जुब्लियाना । स्लोभेनियाले इजरायली प्रधानमन्त्री बेन्जामिन नेतान्याहुलाई देश प्रवेशमा प्रतिबन्ध लगाएको छ ।
यो निर्णय अन्तर्राष्ट्रिय फौजदारी अदालत (आइसिसी) ले जारी गरेको गिरफ्तारी वारेन्टसँग प्रत्यक्ष रूपमा सम्बन्धित भएको स्लोभेनियाली विदेश मन्त्रालयकी अधिकारी नेभा ग्रासिकले एसटीए समाचार एजेन्सीलाई बताउनुभयो ।
गत वर्ष करिब २० लाख जनसङ्ख्या भएको यस युरोपेली सङ्घ (इयु) सदस्य राष्ट्रले प्यालेस्टिनी राज्यलाई मान्यता दिएको थियो । गाजामा इजरायलका गतिविधिप्रति तीव्र आलोचक रहेको स्लोभेनियाले नेतान्याहुविरुद्ध कदम चालेर आफ्नो नीति अझ प्रष्ट पारेको देखिन्छ ।
यसअघि स्लोभेनियाले इजरायली राष्ट्रिय सुरक्षामन्त्री इटामार बेन–गभिर र अर्थमन्त्री बेजलेल स्मोट्रिचलाई पनि देश प्रवेशमा प्रतिबन्ध लगाइसकेको छ । साथै, इजरायलमा हतियार आपूर्ति रोकेको छ ।
विदेश मन्त्रालयले भनेको छ, “स्लोभेनियासहित आन्तरिक अदालतद्वारा बाध्य सबै देशहरूले कब्जा गरिएको प्यालेस्टिनी क्षेत्रमा इजरायलको अवैध उपस्थितिलाई मान्यता दिनु हुँदैन, न त त्यसलाई कायम राख्न सहयोग पुर्याउनु पर्छ ।”
स्लोभेनियाली सरकारले सामाजिक सञ्जाल एक्समा विज्ञप्ति जारी गर्दै भनेको छ, “यो निर्णयले इजरायल राज्यलाई स्पष्ट सन्देश दिन्छ—स्लोभेनियाले अन्तर्राष्ट्रिय अदालतको आदेश र अन्तर्राष्ट्रिय मानवीय कानूनप्रति निरन्तर सम्मानको अपेक्षा गर्दछ ।”
यसैसँग, सरकारले स्लोभेनिया ‘अन्तर्राष्ट्रिय कानून, मानव अधिकारका विश्वव्यापी मूल्य र सैद्धान्तिक तथा सुसङ्गत विदेश नीतिप्रति प्रतिबद्ध’ रहन्छ भनी पुनः पुष्टि गरेको छ ।
