महेश रिजाल, भालुबाङ (दाङ) ।
राजपुर गाउँपालिका वडा नं. ३ को विकट करङ्गाखोलाका विद्यार्थीहरूलाई छ किमि दुरी पार गर्नुपर्ने बाध्यता रहेको छ ।
कक्षा ६ देखिमाथिका सबै बालबालिकालाई उक्त दुरी पार गर्न पैदल यात्रा गर्नुपर्ने बाध्यता रहेको हो ।
आउँदाजाँदा सो दुरी १२ किमि पुग्न जान्छ । उक्त बाटोमा खोलाखाल्सी र भिरपाखा पर्दछन् । भैसहवादेखि सिधै पूर्वतर्फ रहेको खरदरियास्थित शङ्कर माध्यमिक विद्यालय पुग्न करिब दुई किमि दुरी तय गर्नुपर्ने बाध्यता छ भने करङ्गाखोलादेखि भैसहवासम्म करिब चार किमि दुरी पार गर्नुपर्ने बाध्यता छ ।
त्यहाँ रहेको एक मात्र शङ्कर प्राथमिक विद्यालय करङ्गाखोलामा शिशुदेखि कक्षा ५ सम्म मात्र विद्यालय हुँदा त्यहाँका बालबालिकालाई अध्ययन गर्न कठिनाइ भएको हो । उक्त गाउ“का अधिकांश दलित समुदाय र जनजातिको बस्ती रहेकोले सो गाउ“मा एक सय १५ घरधुरी गाउँलेको वसोबास रहेको छ ।
साना साना नानीबाबु घर नफर्किंदासम्म निकै अत्यास लाग्ने शङ्कर प्राथमिक विद्यालय करङ्गाखोलाका विद्यालय व्यवस्थापन समितिका अध्यक्ष तुलसीकुमारी रोकाले जानकारी दिनुभयो ।
त्यस्तै, ती साना साना बालबालिका घर नफर्किन्जेलसम्म मनमा बेचैनी आइरहने शिक्षाप्रेमी धनलाल बुढामगरले जानकारी गराउनुभयो ।
उक्त गाउ“मा पुग्न भैसहवादेखि करङ्गा खोलासम्म छ किमि दुरी रहेको भए तापनि उक्त कच्ची सडकमा खाल्डाखुल्डी, भिरपाखासमेत रहेका कारण त्यहाँको यात्रा चुनौतीपूर्ण रहेको यातायात व्यवसायी बताउँछन् ।
