काठमाडौं । नेकपा (मसाल) का प्रवक्ता रामप्रकाश पुरीको म्यासेन्जरबाट बिहीबार एकैचोटी धेरै चिनजानका व्यक्तिहरूसँग रकमका लागि आग्रह आयो ।
ठूलो परिमाणमा रकम माग भएपछि कतिपय साथीसाइ तथा आफन्तले प्रवक्ता पुरीलाई ठूलै आपत आइपरेछ कि भनेर सोधपुछ गर्न थाले । पार्टीको एउटा मिटिङमा व्यस्त पुरीलाई तत्काल त्यो विषय थाह भएन ।
तर, सँगै बसेका साथीको मोबाइलमा समेत उहाँको म्यासेन्जरबाट रकम माग भएको देखेपछि सोधखोज गर्ने क्रममा प्रवक्ता पुरीको फेसबुक आईडी ह्याक भएको थाह भयो ।
त्यसपछि फेसबुक खोलेर हेरेका पुरीले धमाधम रकम माग गर्दै म्यासेज पठाएको देखेपछि कैयौँ साथीहरूलाई फोन गरेर आईडी ह्याक भएको जानकारी दिनुभयो । तत्काल केही साथीहरूको फेसबुकमार्फत उहाँको आईडी ह्याक भएको सूचना जारी भयो ।
यस्तै, समस्या आज (शुक्रबार) बुटवलस्थित कम्युनिष्ट संग्रहालयका अध्यक्ष चेतनाथ आचार्यले भोग्नुभएको छ । आचार्यको फेसबुक आईडी पनि ह्याक गरेर ह्याकरले कैयौँ व्यक्तिसँग रकम माग गरिरहेको पाइएको छ ।
कसरी भयो आईडी ह्याक ?
मसाल प्रवक्ता पुरीका अनुसार सुरुमा कुनै एकजना चिनजानका साथीको म्यासेन्जरबाट उहाँलाई नम्र भाषामा एउटा अनुरोध आयो । रुकुमपूर्वका ती साथीको नामबाट ‘हामीले सोसाईटी हितका लागि एउटा फेसबुक पेज खालेका छौँ । तपाइँ पनि हामीसँग जोडिन चाहनुहुन्छ कि ?’
नजिकका मित्रबाट आएको सो आग्रहलाई प्रवक्ता पुरीले सहजै स्वीकार गर्नुभयो । त्यसपछि तपाइँको मोबाइलमा एउटा पिन नम्बर आएको छ, त्यो पठाइदिनु न भनेर आग्रह गरियो ।
पुरीले पिन नम्बर पठाउनासाथ उहाँको फेसबुक आईडी ह्याक भयो ।
यसरी नै पुरीको म्यासेन्जरबाट चेतनाथ आचार्यसँग पिन नम्बर मागियो । प्रवक्ता पुरीको आईडी ह्याक भएको जानकारी नपाएका आचार्यले सहजै आफ्नो मोबाइलमा आएको नम्बर पठाइदिनुभयो । र, उहाँको पनि फेसबुक ह्याक भयो ।
ह्याकरले दुवै आईडीबाट देश विदेशमा रहेका व्यक्तिहरूसँग ठूलो मात्रामा रकम माग गर्ने र अन्य व्यक्तिको समेत फेसबुक आईडी ह्याक गर्ने प्रयास गरिरहेको पाइएको छ ।
उक्त ह्याकर नजिकबाट चिनजानकै व्यक्ति भएको उसको गतिविधिबाट बुझ्न सकिन्छ ।
प्रवक्ता पुरीले अरु साथीहरूलाईे फेसबुक आईडी ह्याक हुन नदिन सचेत रहन आग्रह गर्नुभएको छ । साथै, म्यासेन्जरबाट रकमको माग गर्ने वा ओटीपी कोड माग गरेमा राम्रोसँग बुझेर मात्रै व्यवहार गर्न पनि उहाँको आग्रह छ ।
आफ्नो फेसबुक आईडी ह्याक भइसकेपछि प्रहरीको साईबर ब्यूरोलाई जानकारी दिनुभएका पुरीले प्रहरीले आवश्यक अनुसन्धान गरिरहेको युगदर्शनलाई बताउनुभयो ।
समस्या डरलाग्दो
नेपाल प्रहरीको साइबर ब्यूरोले फेसबुक आईडी ह्याक हुने समस्या निकै बढेको बताएको छ । ब्यूरोका प्रवक्ता एसपी दीपकराज अवस्थीका अनुसार निकै ठूलो संख्यामा फेसबुक आईडी ह्याक हुने र त्यसको दुरुपयोग गर्ने गरिएको पाइएको छ ।
‘ह्याकरले फेसबुक आईडी ह्याक गरिसकेपछि कतिपयको सामन्य फेसबुक चलाउने गरेको पाइएको छ भने कतिपयबाट रकमहरू माग गर्ने देखिन्छ’ एसपी अवस्थीले युगदर्शनसँग भन्नुभयो, ‘तर, यो समस्या एकदमै बढेको छ ।’
फेसबुक युजरकै लापरबाहीले आईडी ह्याक हुने पनि एसपी अवस्थीले बताउनुभयो ।
उहाँले भन्नुभयो, ‘युजरकै लापरवाहीका कारण फेसबुक ह्याक हुने हो । त्यसकार युजर सचेत हुन आवश्यक छ । आफ्नो फिचर्सहरू सेयर नगर्ने, ओटीपी सेयर नगर्ने हो भने ह्याक हुँदैन ।’
