कपिलवस्तु । राष्ट्रिय जनमोर्चाक ाकेन्द्रीय सदस्य तथा लुम्बिनी प्रदेश सभा सदस्य तारा थापा क्षेत्रीले दुई ठूला दल नेपाली कांग्रेस र नेकपा एमाले मिल्नुको कारण भुटानी शरणार्थी र गिरिबन्धु टी स्टेट भएको बताउनु भएको छ ।
राष्ट्रिय जनमोर्चा कपिलवस्तुले शनिबार (भदौ २९ गते) चन्द्रौटामा आयोजना गरेको विरोध सभालाई सम्बोधन गर्दै थापाले यस्तो बताउनुभएको हो ।
प्रमुख अतिथि थापाले संसदका दुई ठूला दल मिलेर सत्ता चलाउनु राम्रो संकेत होइन भन्नुभयो ।
उहाँले देशको आम्दानी नौ खर्ब मात्रै रहेको उल्लेख गर्दै बजेटको अधिकांश हिस्सा वैदेशिक ऋणको भर पर्नुपर्ने अवस्था आएको बताउनुभयो । उहाँले संघीयता पूर्ण रूपमा असफल भएको दाबी पनि गर्नु भयो ।
कार्यक्रमलाई सम्बोधन गर्दै राष्ट्रिय जनमोर्चाका केन्द्रीय सदस्य रामकुमार क्षत्रीले कांग्रेस, एमाले, एमाओवादीका गलत नीतिका कारण देशमा संकट पैदा भएको उल्लेख गर्दै देशमा बेरोजगार बढ्नु, कलकारखाना ध्वस्त हुनु, महँगी भष्टाचार बढ्नुको जवाफ सत्ताधारीहरूले दिनुपर्ने बताउनुभयो ।
विरोध सभालाई अखिल नेपाल किसान संघका केन्द्रीय उपाध्यक्ष शिव पौडेल र नेकपा मसालका जिल्ला प्रवक्ता माधव भाट क्षेत्रीले पनि सम्बोधन गर्नु भएको थियो ।
राष्ट्रिय जनमोर्चाका केन्द्रीय सल्लाहकार दधिराम आचार्यको समेत आतिथ्यता रहेको कार्यक्रममा शहीदहरुप्रति एक मिनेट मौन धारण गरिएको थियो । राष्ट्रिय जनमोर्चाका जिल्ला अध्यक्ष हरिप्रसाद बेल्बासे को अध्यक्षतामा भएको सभाको सञ्चालन जिल्ला सचिव केरसिंह अदैले गर्नु भएको थियो भने स्वागत कोषाध्यक्ष केहरसिंह पुन मगरले गर्नु भएको थियो ।
