भीमदत्तनगर । कञ्चनपुरमा अखिल (छैठौं) को भेला जिल्ला सम्पन्न भएको छ ।
महासचिव सुवाश जिसीको प्रमुख आतिथ्यमा २०८१ भदौ ८ गते शनिबार अमरपुरमा उक्त भेला सम्पन्न भएको हो ।
भेलामा प्रशिक्षणात्मक मन्तव्य राख्दै उहाँले युवाविद्यार्थीलाई राजनीतिमा आउन आह्वान गर्नुभयो ।
‘राजनीति सम्पूर्ण नीतिको पनि प्रमुख नीति हो । राजनीति नराम्रो हुँदा देशका कुनै पनि नीतिले सही काम गर्न सक्दैनन्’ उहाँले भन्नुभयो– ‘अहिले देशको बिग्रदो अवस्था भ्रष्ट, तस्कर, दलाल र अचेतहरूले राजनीति गर्दाको परिणाम हो । त्यसकारण सचेत युवा विद्यार्थी राजनीतिमा आउनुपर्दछ ।’
कार्यक्रममा तराई मधेस जनवादी मोर्चाका महासचिव राजाराम चौधरी, राष्ट्रिय जनमोर्चा कन्चनपुरका अध्यक्ष रामबहादुर कार्की, अखिल नेपाल ट्रेड युनियन महासङ्घ (अन्टुक) का सुदूरपश्चिम प्रदेश समितिका संयोजक जनक कुँवर, नेकपा (मसाल) कञ्चनपुरका प्रवक्ता लक्ष्मीदत्त बडु, राजमो कैलालीका अध्यक्ष जगतप्रसाद जोशी, सचिव लालबहादुर कुँवर, अखिल नेपाल शिक्षक सङ्घका केन्द्रीय सल्लाहकार तारामणि न्यौपानेलगायतका नेताहरूले शुभकामना दिनुभएको थियो ।
प्रमुख अतिथि जिसिले ब्यानर पढेर उद्घाटन गर्नुभएको कार्यक्रममा सहिदको सम्झनामा एक मिनेट मौनधारण गरिएको थियो ।
कार्यक्रमको अध्यक्षता दीपेन्द्र कार्कीले, सञ्चालन क्रान्ति चौधरीले तथा स्वागत सचिन तिरुवाले गर्नुभएको थियो ।
अध्यक्षमा कार्की
भेलाले दीपेन्द्र कार्की अध्यक्ष रहनुनभएको अखिल (छैठौं) को १५ सदस्यीय कञ्चनपुर जिल्ला समिति चयन गरेको छ ।
समितिको उपाध्यक्षमा सुन्तली चौधरी, सचिवमा चन्द्रिका विक, सहसचिवमा खगेन्द्र पुन र कोषाध्यक्षमा तिलक चौधरी रहनुभएको छ ।
त्यसैगरी सदस्यहरूमा रमेश साउद, सुरेन्द्र ऐर, शेखर कार्की, मोहित थापा, रचना चौधरी र सचिन तिरुवा तथा वैकल्पिक सदस्यमा अस्मिता बोहोरा र शिखा कार्की रहनुभएको छ ।
