खिमराज चालिसे, चन्डिगढ ।
राष्ट्रिय जनमोर्चाका उपाध्यक्ष तथा प्रवक्ता दुर्गा पौडेललले मूल प्रवाह अखिल भारत नेपाली एकता समाजले भारतस्थित नेपालीहरूलाई इमानदार, लगनशील र सक्रिय रहन सिकाएको बताउनुभएको छ ।

जुलाई १३, २०२४ का दिन मूल प्रवाहको डेराबससी र चण्डिगढ नगर सम्मेलनको उद्घाटन गर्दै उहाँले यस्तो अभिव्यक्ति दिनुभएको हो ।

‘भारत प्रवासमा एकता समाजले छिन्नभिन्न नेपालीहरूलाई सङ्गठित गर्दै इमानदार, लगनशील र सक्रियता रहन सिकाएको छ’ उहाँले भन्नुभयो ।

उहाँले अगाडि भन्नुभयो– ‘एकता समाजले समानताको लडाइँ वर्गीय रूपमा पाँचै औला मुठ्ठी कसेर सङ्गठित हुँदै लडन सिकायो ।’

राष्ट्रमा व्याप्त भ्रष्टाचार, महङ्गी, बेरोजगार युवाको पलायनलगायतका विषयमा चर्चा गर्दै राजमो नेतृ पौडेलले नेपालमा सङ्घीयता साम्राज्यवादले लादेको एजेन्डा भएको बताउनुभयो

देशको समसामयिक राजनीतिक परिस्थितिबारे चर्चा गर्दै उहाँले देशमा प्रतिगमनको खतरा रहेको चेतावनी दिनुभयो । उहाँले भन्नुभयो– ‘लोकतन्त्र र अग्रगमन पक्षधर जनताको चेतना स्तर उठाउन सकिएन भने देशमा प्रतिगमन हुन सक्ने छ ।’

सम्मेलनका विशिष्ट अतिथि मूल प्रवाहका केन्द्रीय अध्यक्ष ठाकुर खनालले सम्मेलन अभियानमा नयाँ कार्यकर्ता प्रवेश गराउने र पुराना र सङ्गठित कार्यकर्तामा थप उत्साह र ऊर्जा भर्ने एउटा अभियान रहेको तर्क राख्नुभयो ।

कार्यक्रममा मूल प्रवाहका केन्द्रीय सदस्यहरू दिनेश खडका, तिलक पौडेल र खिमराज चालिसे, केन्द्रीय सल्लाहकार प्रेम आचार्य, महिला क्षेत्रीय समितिकी जुना चालिसे, जापान नेपाली एकता समाज केन्द्रीय सदस्य नवीन बस्याल, केन्द्रीय सांस्कृतिक विभागका बिनु नेपाली, विद्यार्थी सङ्घका केन्द्रीय सदस्य नारायण आचार्य, जनजाति नेता थमन थापालगायतको आथित्य रहेको थियो ।

बन्दशत्र

उद्घाटन शत्रको समापनसँगै खिमराज चालिसे, सीमा खडकासहितको तीन सदस्यीय अध्यक्षमण्डलको गठनपछि एरिया समितिबाट रिपोर्टिङ गरिएको थियो । सो क्रममा सिटी एरियाबाट प्रेम गुरुङ, मध्य सिटीबाट लक्ष्मण पाण्डे, मोहालीबाट जुना चालिसे, इन्डस्ट्रियल एरियाबाट थानेश्वर पाण्डे, पञ्चकुलाबाट सुरेश आचार्य र डेराबसीबाट दिलमाया लुइँटेलले रिपोर्टिङ गर्नुभयो ।

कार्यक्रममा चन्डिगढ नगर समितिको प्रगति प्रतिवेदन तेजबहादुर रोकाले, आर्थिक प्रतिवेदन किसन खनालले प्रस्तुत गर्नुभयो भने डेराबसीको प्रगति प्रतिवेदन दिलमाया लुइटेलले र आर्थिक प्रतिवेदन काजीमान राईले प्रस्तुत गर्नुभयो । दुबै प्रतिवेदन व्यापक छलफलपश्चात हाउसले पास गरेको थियो ।

बन्दशत्रमा ठाकुर खनाल, दिनेश खडका र जुना चालिसे रहेको निर्वाचन आयोग गठन गरिएको थियो ।

तेजबहादुर रोकाको सञ्चालन तथा मानबहादुर केसीको अध्यक्षतामा अघि बढेको सो सम्मेलनमा काजीमान राई र रक्तिम सांस्कृतिक कलाकारले स्वागत गर्नुभएको थियो ।