काठमाडौँ । अखिल नेपाल पशुपालन तथा दुग्ध उत्पादक किसान सङ्घले लकडाउनको सन्दर्भमा दुग्ध उत्पादनसँग सम्बन्धित समस्या समाधान गर्न सरकारसित माग गरेको छ । सङ्घले पशुपालन क्षेत्रमा आवश्यक आहारको व्यवस्थापन गर्न, दुध र दुधजन्य पदार्थको बजारीकरण सुनिश्चित गर्न र कृषि मल, बिउ र औजारको व्यवस्था गर्न माग गरेको हो ।

अखिल नेपाल किसान महासङ्घको आङ्गिक सङ्गठनको रूपमा रहेको सो सङ्घका महासचिव जीवनकुमार भट्टराईले २०७७ वैशाख ८ गते प्रेसवक्तव्य जारी गर्दै यस्तो माग गरिएको हो । कोरोना सङ्क्रमण नियन्त्रण गर्न सरकारले घोषणा गरेको लकडाउनप्रति समर्थन गर्दै त्यसको प्रभावकारी कार्यान्वयनमा जोड दिइएको वक्तव्यको पूर्ण पाठ यस्तो छ :

“अखिल नेपाल पशुपालन तथा दुग्ध उत्पादक किसान सङ्घ लकडाउनको समयमा दुग्ध उत्पादनसँग सम्बन्धित किसानका समस्या समाधान गर्नेतर्फ सरकारको उदासिनता र सम्भावित सङ्कटप्रति गहिरो चिन्ता प्रकट गर्दछ । किसानका समस्या समयमै सम्बोधन गर्नेतर्फ सरकार गम्भीर नबने पशुपालन तथा दुग्ध उत्पादन क्षेत्रमा नकारात्मक असर पर्नेतर्फ हामी सरकारको गम्भीर ध्यानाकर्षण गराउन चाहान्छौँ ।

चीनको हुनान प्रान्तबाट सुरु भई विश्वव्यापी रूपमा फैलिएको कोरोना भाइरस (कोभिड–१९) कारण हालसम्म विश्वभरिमा एक लाख ६५ हजारभन्दा बढीको मृत्यु हुनु अत्यन्त दुखद छ । औषधि बन्न नसक्नुले यसको गम्भीरतालाई बढाएको छ । मानिसबाट मानिसमा सङ्क्रमणको घातक चरित्र भएको यो भाइरस नियन्त्रणको सबैभन्दा प्रभावकारी उपाय शारीरिक दुरी कायम राख्नु नै रहेको छ ।

गत चैत्र ११ गतेदेखि नेपाल सरकारले लकडाउन (बन्दाबन्दी) घोषणा गरी रोग नियन्त्रणमा गरेको प्रयासप्रति समर्थन जनाउँदै यसको प्रभावकारी कार्यान्वयनमा हाम्रो सङ्गठनले जोड दिन्छ । साथसाथै लकडाउनअन्तर्गत पनि जीवनसँग अन्तरसम्बन्धित विषयलाई यथोचित परिचालनमा प्रभावकारी कार्यक्रम बनाउन नसक्नुमा सरकारको गम्भीर कमजोरी देखिन्छ ।

देश लकडाउनमा रहेको झण्डै महिनादिन भइसकेको र यो स्थिति अझै लम्बिने सम्भावनाप्रति विचार गर्दै कृषि, पशुपालन, साना व्यवसाय, दुग्ध उत्पादन र बजार व्यवस्थापनको सम्बन्धमा राज्य उदासिन बन्नु र कुनै पनि कार्यक्रम सार्वजनिक नगर्ने रवैया घोर आपत्ति छ । हामी कृषि क्षेत्रमा गम्भीर सङ्कट निम्तिन नदिन सरकारसँग ठोस कार्यक्रम घोषणा गर्न माग गर्दछौँ ।

पशुपन्छीको दाना तथा मलबिउको जोहो गर्ने विषयलाई उपेक्षा गर्ने सरकारको नीतिबाट उत्पन्न सङ्कटप्रति गम्भीर ध्यानाकर्षण गराउँदै पशुआहारको सहज आपूर्ति गर्न, उत्पादित दुधको नियमित बजार व्यवस्था गर्न तथा कृषि मल, बिउ र औजारको व्यवस्था गर्न हाम्रो सङ्गठन माग गर्दछ ।”