गोपालप्रसाद भट्टराई, सन्धिखर्क ।
अखिल नेपाल टे«ड युनियन महासङ्घ (अन्टुक) जिल्ला अध्यक्ष इन्द्रमणि भुसाललाई पितृशोक परेको छ ।
अखिल नेपाल शिक्षक सङ्घका जिल्ला उपाध्यक्षसमेत रहनुभएका भुसालका पिता ऋषिराम भुसालको ८० वर्षको उमेरमा २०८१ जेठ २ गते बुधबारका दिन उपचारको क्रममा सन्धिखर्कस्थित छाया हस्पिटलमा निधन भएपछि उहाँ शोकमा पर्नुभएको हो ।
अखिल नेपाल राष्ट्रिय यातायात मजदुर युनियनका जिल्ला सदस्यसमेत रहनुभएका ऋषिराम लामो समयदेखि दीर्घरोगले ग्रस्त हुनुहुन्थ्यो ।
२००१ सालमा जन्मिनुभएका स्मृतिशेष ऋषिराम राष्ट्रिय जनमोर्चामा आबद्ध रहेर समाजसेवा र परिवर्तनको आन्दोलनमा भूमिका खेल्दै आउनुभएको थियो ।
उहाँको जेठ २ गते सन्धिखर्कस्थित गच्छेघाटमा अन्तिम दाहसंस्कार गरिएको छ । दाहसंस्कार पूर्व उहाँलाई अन्तिम श्रद्धाञ्जली र सम्मान दिन राष्ट्रिय जनमोर्चा अर्घाखाँचीले गच्छेघाटमै शोकसभा पनि सम्पन्न गरेको छ ।
राजमोका लुम्बिनी प्रदेश समितिका सल्लाहकार शेरबहादुर विसीले उहाँको पार्थिव शरीरमा पार्टीको झन्डा ओढाएर अन्तिम बिदाइ गर्नुभएको थियो ।
गच्छेघाटमा सहभागी पार्टीका नेता, शुभचिन्तक र आफन्तजनले उहाँको पार्थिव शरीरमा फूल तथा अबिर चढाएर श्रद्धाञ्जली दिएपछि राजमो केन्द्रीय सदस्य सागर केसीले सम्बोधन गर्नुभएको थियो ।
भेषराज भुसालको सञ्चालनमा सम्पन्न शोकसभामा बोल्दै राजमो केन्द्रीय सदस्य केसीले स्मृतिशेष भुसालको जीवनशैली अनुशासित, सरल र सहयोगी स्वभावमा बितेको स्मरण गर्नुभएको छ ।
शोकसभामा नेकपा (एमाले) अर्घाखाँची सदस्य जगत् खड्का, नेकपा (माओवादी केन्द्र) का नेता विष्णु बन्जाडे, रास्वपाका जिल्ला संयोजक हरिप्रसाद भुसालसहित राजमोका विभिन्न तहका नेता तथा शुभचिन्तकको बाक्लो उपस्थिति रहेको थियो ।
स्मृतिशेष भुसालका दुई छोरा र तीन छोरीहरू रहेका छन् ।
