काठमाडौं । राष्ट्रिय जनमोर्चाले देशका विभिन्न भागमा भइरहेको आगलागीका घटनाबाट जनधनको क्षति भएकोप्रति ध्यानाकर्षण भएको जनाएको छ ।
राजमोले बिहीबार (१३ वैशाखमा) एक विज्ञप्ति प्रकाशित गरी आगलागी पीडितलाई राहत प्रदान गर्न भूकम्प र बाढी प्रभावितलाई जस्तै विशेष कोषको व्यवस्था गर्न माग गरेको छ ।
उपाध्यक्ष एवम् प्रवक्ता दुर्गा पौडेलद्वारा जारी विज्ञप्तिमा विश्वब्यापीरुपमा बढ्दै गइरहेको तापक्रमको असर जलवायुमा परेको र जलवायु परिवर्तनका कारण जनताको जीवनस्तर कष्टकर बन्दै गइरहेको उल्लेख छ ।
यस्तो छ विज्ञप्ति
देशमा बढ्दै गइरहेको आगलागीका घटनाप्रति राष्ट्रिय जनमोर्चाको गम्भीर ध्यानाकर्षण भएको छ । पहाड र तराई दुवैतिर आगलगाीका घटना बढिरहेका छन् । आउने महिनाहरूमा त्यसप्रकारका घटना अरु बढेर जाने निश्चित छ । यो देशब्यापी गम्भीर समस्या हो ।
आगलागीबाट देशमा ठूलो पैमानामा जनधनको क्षति हुने गरेको छ । घरहरू जल्दा जनताको जीवन निर्वाहमासमेत कठीनाई हुने गरको छ ।
आज देशमा बढिरहेको आगलागीका घटनाहरू कुनै आकस्मिक घटना नभएर विश्वब्यापीरुपमा बढ्दै गइरहेका जलवायु परिवर्तनका परिणामहरू हुन् । विश्वमा तापक्रम लगातार बढ्दै गइरहेको छ । ठूला पूजीवादी देशहरुमा ठूलो पैमानमा बढेर गएका उद्योगहरूका कारणले नै यस्तो स्थिती उत्पन्न भएको हो ।
जलवायू सम्बन्धी विभिन्न अन्तर्राष्ट्रिय सम्मेलनहरुमा विश्वमा बढ्दै गइरहेृको तापक्रम घटाउनेबारे छलफल हुन्छ, र त्यसका लागि कैयौं सम्झौताहरू पनि हुन्छन् । तर तिनिहरुले कार्यान्वयन गर्नका लागि ठूला पुँजीवादी राष्ट्रहरु नै अवरोध बनेर उभिन्छन् । त्यसको परिणामस्वरुप विश्वमा तापक्रम बढ्दै जान्छ, र त्यसको असर जलवायुमा पर्दछ । त्यसको परिणामस्वप विश्वमा पानीका स्रोतहरू सुक्दै गइरहेका छन् । जीवजन्तुहरूका कैयौँ प्रजातीहरु नष्ट हुँदै गइरहेका छन् । हिमालयको हिउँ पग्लँदै गइरहेको छ ।
यसले गर्दा कृषिमा प्रतिकुल असर परिरहेको छ । ती सबैको परिणामस्वरुप मानव जातिको भविष्यमा नै गम्भीर असर पुग्ने कुरा स्पष्ट छ । केही दशकहरुपछि नै पृथ्वीमा जीवन असैह्य बन्दै जाने खतरा बढिरहेको छ ।
आज देशमा बढिरहेको आगलागीलाई विश्वस्तरमा भइरहेको जलवायु परिवर्तनको पृष्ठभूमीमा नै हेर्नु र बुझ्नुपर्दछ । त्यो अवस्थामा एकातिर विश्वस्तरमा नै जलवायूमा भइरहेको परिवर्तनमा सुधारका लागि विशेष पहलकदमी गर्न हामीले सरकारसित माग गर्दैछौँ भने अर्कोतिर आगलागीका घटनाहरूलाई रोक्नका लागि सरकारले ठोस र दीर्घकालीन प्रकारले योजना बनाएर काम गर्नुपर्ने आवश्यकता छ ।
तत्कालीन रुपमा आगलागीबाट जनतालाई जुन ठूलो क्षति पुगेको छ, त्यसको समाधानका लागि पनि सरकारले ठोस योजना बनाउनुपर्ने आवश्यकतामा हाम्रो पार्टीले जोड दिन्छ । त्यसको लागि भूकम्प पीडित वा बाढीद्वारा पीडित जनताको लागि सरकारले कार्यक्रम बनाएजस्तै आगलागीबाट पीडित जनताका लागि पनि सरकारले एउटा आपतकालीन कोष बनाएर काम गर्नका लागि हामीले सरकारको ध्यानआकर्षित गर्न चाहन्छौँ ।
दुर्गा पौडेल
उपाध्यक्ष तथा प्रवक्ता
राष्ट्रिय जनामोर्चा
