रामप्रकाश पुरी
का. सन्तबहादुर नेपालीले आफ्नो समूहको राष्ट्रिय भेलापछि एउटा वक्तव्य जारी गर्नुभएको छ । हामीले उक्त वक्तव्यमा उहाँले प्रकट प्रस्तुत गरेको एउटा दृष्टिकोणबारे विशेष ध्यान राख्न चाहन्छौँ । उक्त वक्तव्यमा वर्तमान गठबन्धनबारे यो दृष्टिकोण प्रस्तुत गरिएको छ : ‘काग्रेस समेतको गठबन्धन र एमाले सहितको गठबन्धनमा केही फरक पनि छ । अहिलेको गठबन्धनमा थोरै भएपनि वाम पक्षीय नीति भएका दलहरुको वर्चस्व छ । त्यसकारण तुलनात्मक रुपले सकारात्मक छ ।’
वाम पक्षीय नीति भएका दलहरूको वर्चस्व’ भनेर उहाँले माओवादी केन्द्र, एमाले र समाजवादीप्रति लक्षित गरेको स्पष्ट छ । एमालेले केपी ओलीको नेतृत्वमा प्रतिगमनको नेतृत्व गरेको थियो । ओलीका संविधान, संसदीय व्यवस्थाका मूल्य, सर्वोच्च अदालतका निर्णय विपरितका गतिविधिलाई समकालीन राजनीतिले राम्रोसँग देख्न सक्दछ ।
उनको त्यस प्रकारको प्रतिगमनकारी कार्यका विरुद्ध संघर्ष गरेका पक्षलाई कमजोर बनाउन ओलीले राजावादी लगायतका विभिन्न प्रतिगामी तत्वहरुसित गठजोड गरेको कुरा पनि इतिहाससिद्ध छ । पछिल्लो गठबन्धनमा उनले राजावादी शक्तिलाई पनि सामेल गर्ने प्रयत्न गरेका थिए तर त्यसमा उनी सफल भएनन् । गत कालमा सम्पन्न भएका विभिन्न तहका चुनावमा उनको कार्यगत एकता राजावादी लगायतका प्रतिगामी तत्वहरुसित नै भएको थियो ।
यसरी एमालेले समग्रमा प्रतिगमनका लागि भूमिका खेल्दै आएको छ र अहिले पनि त्यसको मुख्य झुकाव प्रतिगमनतर्फ नै छ । त्यो सन्दर्भमा तत्कालीन प्रधानमन्त्री केपी ओलीद्वारा उठाइएका प्रतिगमनकारी कदमलाई अहिले सही प्रमाणित गर्नका लागि त्यसले बारम्बार गरेका प्रयत्नको अर्थ यो हुन्छ कि गणतन्त्र वा धर्मनिरपेक्षताप्रति त्यसले जतिबेला पनि विश्वासघात गर्न सक्दछ ।
यस प्रकारको पारदर्शी विषयमाथि दृष्टि पु¥याउन नसकेर का. सन्तबहादुरले सत्ता स्वार्थको दाउपेचमा गणतन्त्र र धर्मनिरपेक्षतालाई लिलाममा राख्न सक्ने एमालेलाई वाम पक्षीय नीति भएको दलको रूपमा बुझ्दै अहिलेको गठबन्धनलाई ‘तुलनात्मक रुपमा सकारात्मक’ बताउनु भएको छ ।
वाम पक्षीय नीति भएका, प्रजातान्त्रिक वा लोकतान्त्रिक शक्तिहरूले पनि प्रतिगमनको बाटो लिन्छन् र त्यो अवस्थामा तिनीहरुको त्यस प्रकारको नीतिका विरुद्ध संघर्ष गर्नुपर्ने आवश्यकतालाई उहाँले देख्न सक्नु भएको छैन । त्यसैले ‘वाम पक्षीय नीति भएको दल’ भएकोले अहिलेको गठबन्धन सकारात्मक भएको निष्कर्षमा पुगेर विगतको उहाँहरुको प्रतिगमनपरस्त सोचाइबाट अहिले पनि टाढा जान सक्नु भएको छैन ।
त्यसरी प्रतिगमनपरस्त सोचाइबाट टाढा जान नसकेको भएपनि उहाँको समूहको राजनीतिक प्रतिवेदनमा ‘राजतन्त्र फर्काउन चाहने अहिले कतिपय प्रतिगामी तत्वहरु, बहुलराष्ट्रको नाममा देश विखण्डन गर्न चाहने तत्वहरु सडक संघर्षमा भएको’ भनेर स्वीकार गरिएको छ ।
तर तिनै तत्वहरुका मतियार भएर प्रतिगमनप्रति झुकाव राखिरहेको एमालेलाई भने ‘वाम पक्षीय नीति भएको दल भनेर चोख्याउँदै अहिलेको गठबन्धनलाई सकारात्मक बताउनु हास्यास्पद मान्नु पर्दछ ।
