टेकराज भुसाल, बुटवल । ढाकावाङ्ग–रुपन्देही सम्पर्क समाजको तेस्रो साधारणसभा तथा दोस्रो अधिवेशन शनिबार बुटवलमा सम्पन्न भएको छ। अधिवेशनले ज्ञानप्रसाद खनालको अध्यक्षतामा नयाँ कार्यसमिति निर्विरोध निर्वाचित गरेको छ।
प्रतिनिधिसभा सदस्य हरिप्रसाद भुसालले अधिवेशनको उद्घाटन गर्दै समाजले सामाजिक एकता, आपसी सहकार्य र रचनात्मक गतिविधिमार्फत ढाकावाङ्गवासीलाई रुपन्देहीमा संगठित गर्दै जन्मभूमिको विकास, सामाजिक सम्बन्ध र सांस्कृतिक पहिचानलाई जोड्ने महत्वपूर्ण काम गरेको बताउनुभयो। उहाँले नयाँ नेतृत्वले संस्थालाई थप गतिशील र प्रभावकारी बनाउँदै सबैलाई समेटेर अघि बढ्ने विश्वास व्यक्त गर्नुभयो।
कार्यक्रममा विभिन्न सम्पर्क समाजका प्रतिनिधिले शुभकामना मन्तव्य दिँदै संस्थागत विकास तथा सामाजिक सेवाका क्षेत्रमा थप प्रभावकारी काम गर्न सुझाव दिएका थिए। संस्थाका अध्यक्ष कृष्णप्रसाद खनालले प्रगति विवरण तथा आगामी योजनाबारे जानकारी गराउनुभएको थियो। सचिव नारायणप्रसाद भुसाल ‘बाबु’को सञ्चालन र उपाध्यक्ष युवराज खनालको स्वागतमा सम्पन्न कार्यक्रममा प्रगति तथा आर्थिक प्रतिवेदन सर्वसम्मत रूपमा पारित गरिएको थियो।
अधिवेशनबाट नारायणप्रसाद भुसाल ‘बाबु’ र टेकराज भुसाल उपाध्यक्ष, शिवलाल खनाल सचिव, मेघराज खनाल सहसचिव, लेखनाथ खनाल कोषाध्यक्ष र शान्ता खनाल सह–कोषाध्यक्षमा निर्वाचित हुनुभएको छ। सदस्यहरूमा रामबहादुर अधिकारी, दुर्गा आचार्य (खनाल), प्रेम खनाल, हिमाल खनाल, पुष्पा भुसाल, गौरव खनाल र योगेश खनाल निर्वाचित हुनुभएको छ। एक सदस्य पद रिक्त रहेको छ।
त्यस्तै, लेखा समितिको संयोजकमा गोविन्दप्रसाद भुसाल तथा सदस्यमा ढुण्डिराज खनाल र फुलमाया बन्जाडे निर्वाचित हुनुभएको छ।
नवनिर्वाचित अध्यक्ष ज्ञानप्रसाद खनालले संस्थालाई व्यवस्थित, पारदर्शी, गतिशील र सबैको साझा संस्था बनाउने प्रतिबद्धता व्यक्त गर्नुभएको छ।
