काठमाडौं । नागरिक उन्मुक्ति पार्टीका संस्थापक रेशम चौधरी र अध्यक्ष रञ्जिता श्रेष्ठबीचको विवादले सो दल फुटको संघारमा पुगेको छ ।
श्रीमान–श्रीमतीसमेत रहेका रेशम रञ्जिताबीचको टकरावले पार्टी दुई चिरा बनेको हो ।
पार्टी अध्यक्ष रञ्जिताको निर्देशन सो पार्टीको सुदूरपश्चिम संसदीय दलले अवज्ञा गरेको छ ।
रञ्जिताको ह्वीपविपरित सुदूरपश्चिम प्रदेश संसदीय दलले मुख्यमन्त्री कमलबहादुर शाहलाई विश्वासको मत दिन ह्वीप जारी गरेको छ । नाउपा सुदूरपश्चिम प्रदेश संसदीय दलका प्रमुख सचेतक खुसीराम डगौँराले सांसदहरुलाई अनिवार्य उपस्थित भएर विश्वासको मतको पक्षमा मतदान गर्न निर्देशन जारी गरेका छन् ।
मुख्यमन्त्री शाहले बिहीबार प्रदेश सभामा विश्वासको मत लिँदैछन् ।
यसअघि बुधबार नै नाउपाकी अध्यक्ष रञ्जिता श्रेष्ठले मुख्यमन्त्री शाहलाई विश्वासको मत नदिन ह्वीप जारी गरेकी छन् । नागरिक उन्मुक्ति पार्टीका सांसदहरुलाई पत्र लेख्दै रञ्जिताले यस्तो निर्देशन दिएकी हुन्।
नाउपाको सुदूरपश्चिम प्रदेश संसदीय दललाई प्रदेश सभाको महत्वपूर्ण निर्णयमा ह्वीप लगाउने अधिकार केन्द्रीय अध्यक्षलाई भएको रञ्जिताले बताएकी छन् ।
