नयाँदिल्ली । भाकपा (माले) जनदिशाको एकता महाधिवेशनको उद्घाटन समारोह सम्पन्न भएको छ ।

भारत तेलङ्गाना प्रदेशको खम्मममा मार्च ३, २०२४ का दिन दशौँ हजार सहभागी जुलुस प्रदर्शनपश्चात महाधिवेशनको उद्घाटन समारोह सम्पन्न भएको हो ।

“एकता महाधिवेशन सफल पारौँ, “फासीवादी आरएसएस–भाजपालाई परास्त गर्न एक हौँ” भन्ने नारा लेखिएको ब्यानर खोलेर महाधिवेशनको उद्घाटन गरिएको थियो ।

महाधिवेशनमा भाकपा (माले) क्रान्तिकारी पहल, भाकपा (माले) प्रजा पन्थ र पी.सी.सी. भाकपा (माले) का प्रतिनिधि एवम् समर्थकको सहभागिता रहेको बताइएको छ ।

उपर्युक्त तीनओटै पार्टीका बिच सहमतिपश्चात् पार्टीको नाम भाकपा (माले) जनदिशा राखिएको एकता महाधिवेशन आयोजन गरिएको आयोजकमध्यका एक सदस्यले बताए ।

उद्घाटन कार्यक्रममा मन्तव्य राख्दै सुभास देवले वर्तमान परिवेशमा जनता शिक्षा, स्वास्थ्य अति आवश्यक वस्तुहरूको अभावमा जीविकोपार्जन गर्न बाध्य भएको बताए ।

भारतमा फासिवादी शक्ति हावी भएको हुँदा उदारवादी शक्तिहरू कमजोर हुुनुका साथसाथै मजदुर वर्गको जीवन कष्टकर बनेको उहाँको भनाइ थियो ।

महाधिवेशनको बारेमा बोल्दै उनले भने– ‘हामीले यस्तो ऐतिहासिक सहभागिता सन् १९७७ मा देखेका थियौँ । त्यसैको उद्देश्य पी.सी.सी.आई. र सी.पी.आई. (एमएल) लाई क्रान्तिकारी शक्तिको रूपमा एक गर्नु थियो । त्यति बेला असमर्थ भए पनि यसपाली हामी सफल भएका छौँ ।’

‘केही व्यक्तिका कारण सन् १९७७ मा पार्टी एक बन्न सकेको थिएन तर हामीलाई अहिले विश्वास छ, एउटा कम्युनिस्ट पार्टी बनाएर हामी अगाडि बढ्ने छौँ’ उनले भने– ‘यो सत्य हो, हामी विभिन्न विविधताको बिचमा काम गरिरहेका छौँ । खानपान, रहनसहन आदि पक्षमा समेत हामीमा विविधता छ । यसबाट विचारमा पनि विविधता आउन सक्छ ।’

त्यस्तै, अर्का वक्ता प्रदीपसिंह ठाकुरले महाधिवेशन ऐतिहासिक भएको दाबी गरे ।

उनले भने– ‘यो ऐतिहासिक पक्ष हो । भारतमा विभिन्न खेमामा रहेका क्रान्तिकारी एक भएका छन् । भारतमा कम्युनिस्ट शक्तिहरू एक हुनुको विकल्प छैन ।’

भारतका विभिन्न स्थानमा रहेका क्रान्तिकारी शक्तिहरू एक भई आन्दोलनलाई अगाडि बढाउनुको विकल्प नभएको ठाकुरको भनाइ थियो ।

त्यस्तै, अर्का वक्ता पी. रङ्गाराजले धर्मनिरपेक्ष शक्तिहरू एक हुनुपर्नेमा जोड दिएका थिए ।

उनले भने– ‘धर्मनिरपेक्ष शक्तिहरू एक भए भने जर्मनको हिटलरलाई हराए जस्तै वर्तमान फासिवादी शक्तिलाई पनि परास्त गर्न सकिन्छ ।’

कार्यक्रममा धुवनराज, डिसी गोहाई, अलिक चक्रवर्ती, अनिल मिस्त्री, सञ्जय सिघवी, पी.टी. हरिदास, विमल, विवेकटन्जन, प्रवीण नाटकर, डिएच पुजारा, सी भाष्कर राव, रमा, सूर्यम्, पद्मा, हनुमेल, केजी रामचन्द्रनलगायतको आतिथ्य रहेको थियो ।

महाधिवेशनमा नेकपा (मसाल) को तर्फबाट पनि प्रतिनिधित्व रहेको थियो ।

महाधिवेशनको उद्घाटन समारोहको अन्तिममा राती सहभागी सबैले मोबाइलको टर्च बालेर प्यालेस्टाइनी जनताद्वारा चलाइएको आन्दोलनप्रति ऐक्यबद्धता प्रकट गरिएको थियो ।