बगदाद । इराकमा अमेरिकी नेतृत्वको अन्तर्राष्ट्रिय गठबन्धनको मिसन अन्त्य गर्ने विषयमा छलफल गर्न इराक र अमेरिकाबिच फेब्रुअरी ११, २०२४ आइतबार नयाँ चरणको वार्ता सुरु भएको इराकी सरकारले जनाएको छ ।
इराकी सेनाका प्रवक्ता याह्या रसौलले एक विज्ञप्ति जारी गर्दै उच्च सैन्य आयोग (एचएमसी) ले इराकी सेनाको क्षमताका साथै सैन्य अवस्था, इस्लामिक स्टेट (आइएस) समूहबाट उत्पन्न खतराको स्तरको मूल्याङ्कन गर्न अन्तर्राष्ट्रिय गठबन्धन पक्षसँग बैठक पुन: सुरु गरेको बताउनुभयो ।
रसौलले भन्नुभयो– ‘यी बैठकको आधारमा इराकमा अन्तर्राष्ट्रिय गठबन्धन सल्लाहकारको क्रमिक कटौतीको लागि एउटा समयतालिका तयार गरिने छ, जसले आइएससँग लड्ने गठबन्धन मिसनको अन्त्य र गठबन्धन देशसँग इराकको द्विपक्षीय सम्बन्धमा सङ्क्रमणकालको नेतृत्व गर्ने छ ।’
‘आयोगको काम जतिसक्दो चाँडो सम्पन्न गर्न सकियोस् र बैठकमा कुनै बाधा नपुगोस भनी अन्तर्राष्ट्रिय गठबन्धनसँग समय समयमा बैठक आयोजना गरिने छ’ उहाँले थप्नुभयो ।
जनवरी २५ मा इराकी विदेश मन्त्रालयले एक विज्ञप्ति जारी गर्दै इराकमा अन्तर्राष्ट्रिय गठबन्धन मिसन अन्त्य गर्न र राजनीतिक, आर्थिक, सांस्कृतिक, सुरक्षा तथा सैन्य स्तरमा गठबन्धन देशसँगको विस्तृत द्विपक्षीय सम्बन्धमा उनीहरूको सम्बन्धलाई अगाडि बढाउन एचएमसी गठन गर्न अमेरिकासँग सहमत भएको बताएको थियो । (रासस/एएफपी)
