धार्चुलामा अलपत्र नेपाली महाकाली पारी नाराबाजी गर्दै
काठमाडौं । भारतका विभिन्न शहरमा मजदुरीका लागि गएका हजारौं नेपाली विभिन्न सीमा क्षेत्रमा अलपत्र परेका छन् ।
भारतमा भएको लकडाउनका कारण काम नपाएपछि हिँडेरै नेपाल सीमासम्म आएका उनीहरु सरकारले नेपाल प्रवेश गर्न नदिएपछि सीमामा अलपत्र परेका हुन् । नाबालकसहित महिला र वृद्धवृद्धासमेत ठाउँ ठाउँमा अलपत्र परेका छन् ।
कैयौं दिन भोकै प्यासै हिँडेर आफ्नो घर फर्केका उनीहरुलाई नेपाल प्रहरीले सीमा प्रवेश गर्न नदिएपछि दशगजामै धर्ना दिने र नाराबाजी गर्ने गरिरहेका छन् ।
नेपाल प्रवेशको अनुमति नपाएर सुनौली नाकामा तीन दिनदेखि अलपत्र परेका सयौं नेपाली सोमबार रातिदेखि धर्नामा बसेका छन् । घर फिर्तीको माग गर्दै उनीहरुले दशगजा क्षेत्रमा धर्ना सुरु गरेका हुन् । धर्ना बस्नेमा महिला र बालबच्चा सहित करिब ४ सय जना रहेका प्रहरीले जनाएको छ ।
भैरहवास्थित सुनौली नाकामा घर फिर्तीको माग राखेर धर्ना दिँदै सयौं नेपाली
उनीहरुले नेपाल सरकारले तोकेको स्थानमा क्वारेन्टाइनमा बस्न तयार रहेको समेत जनाएका छन् ।
नाकामा अलपत्र परेकाहरुलाई खानबस्न र खानेपानीको समस्या देखिएको छ । सीमावर्ती बेलहियाका युवा, भैरहवाका विभिन्न संस्था र भारत सुनौलीका स्थानीय मिलेर खानेबस्ने प्रबन्ध मिलाउँदै आएका छन् ।
यता, उत्तराखण्डका विभिन्न शहरबाट धार्चुला आइपुगेका सयौं नेपालीस् महाकाली किनारमा अलपत्र परेका छन् । दार्चुलास्थित महाकाली पुलको गेट नखुलेपछि उनीहरु नेपाल प्रवेश गर्न पाएका छैनन् ।
महाकाली नदी पौडिएर नेपाल प्रवेश गर्नेलाई नियन्त्रणमा लिँदै दार्चुलाका सुरक्षाकर्मी
भारतका विभिन्न शहरबाट कैयौं दिन र घण्टा पैदल हिँडेर आफ्नो देशको सीमानामा पुगेका उनीहरु नेपाल प्रवेश गर्न नपाएपछि सरकारविरुद्ध नाराबाजी सुरु गरेका छन् ।
महाकाली किनारमा अलपत्र परेका दुई जनाले सोमबार महाकाली नदी पौडिएरै तरेका थिए । उनीहरुलाई नेपाल प्रहरीले नियन्त्रणमा लिएर क्वारेन्टिनमा राखेको छ ।
सरकारले सीमानामा अलपत्र परेका नेपालीलाई घर फर्काउने भनेपनि तीन दिनदेखि सीमामा सयौं नेपाली अलपत्र परेका छन् । तर उनीहरु आफ्नो घर फिर्ता हुन पाएका छैनन् ।
कञ्चनपुरको महकाली नगरपालिकामा अलपत्र नेपालीलाई खाना खुवाउँदै स्थानीय र सुरक्षाकर्मी
क्वारेन्टिनको उचित व्यवस्था नहुँदा र सरकारको वेवास्ताका कारण उनीहरुले दुःख पाएका छन् । ठुलो समूहमा रहँदा उनीहरुमा संक्रमण फैलने त्रास पनि उत्तिकै छ ।
