श्यामलाल पोखरेल, बुटवल ।
रुपन्देहीको बुटवलमा कोरोनाको आशंकामा आइसोलेसनमा राखिएको अवस्थामा मृत्य भएका बाबुराम थापामा कोराना नेगटिभ भएको रिपोर्ट आएको छ । हिजो आइतबार बाबुराम थापा क्षेत्रीको मृत्य भएको थियो । कोरोना विशेष आइसोलेसन अस्पतालका सूचना अधिकारी डाक्टर विष्णु गौतमले टेकुस्थित राष्ट्रिय जनस्वास्थ्य प्रयोगशालामा गरिएको परीक्षणमा क्षेत्रीलाई कोरोना संक्रमण नदेखिएको बताएका छन् ।

दुईपटक परीक्षण गर्दा पनि क्षेत्रीको रिपोर्ट कोरोना नेगेटिभ आएपछि क्षेत्रीको सव परिवारको जिम्मा लगाइने अस्पतालले जनाएको छ । रोजगारीको लागि दुबई गएका क्षेत्री गत चैत्र ६ गते राती रुपन्देहीको सैनामैना नगरपालिका ४ सिसौडांडास्थित भाडाको कोठामा पुगेका थिए ।

दुबईबाट आउंदा नै सामान्य ज्वरो आएका क्षेत्री घर आइसकेपछि मेडिकल, स्वास्थ्यचौकी हुँदै चैत १३ गते बुटवल धागो कारखानास्थित अस्थायी कोरोना विशेष आइसोलेसन अस्पतालमा पुगेका थिए । अस्पतालले आइतबार बिहान उनको मृत्यु हुनुअघि स्वाब निकालेर काठमाडौं पठाएको थियो । लुम्बिनी प्रादेशिक अस्पताल बुटवलका कोरोना फोकल पर्सन डाक्टर सुदर्शन थापाले संक्रमण देखिएका मुलुकबाट आएकालाई आइसोलेसन वा क्वारेन्टाइनमा राख्नुपर्ने सरकारको नीति अनुसार आइसोलेसनमा राखिएको बताए ।

डाक्टर थापाले बाबुरामलाई ज्वरो आउने र छातीमा संक्रमण देखिएको अवस्थामा एन्टिबायोटिक औषधि चलाएर उपचार भइरहेको अवस्थामा मृत्यु भएको बताए । थापाको मृत्य भएपछि रुपन्देहीमा कोरोनाको त्रास फैलिएको थियो । थापाको रिपोर्ट आएसंगै रुपन्देहीवासीमा त्रास कम भएको छ ।