काठमाडौँ । सरकारले ग्याँस, खाद्यसामग्रीको दावी गरिरहेकै बेला गोकर्णेश्वर नगरपालिकाले अत्यावश्यक सेवाका खाद्य सामग्री र ग्याँस अभाव हुने नगरवासीका घरघरमा सवारीमार्फत् सेवा पु-याउने दावी गरेको छ ।
कोरोनाको सङ्क्रमणबाट बच्न सरकारले लकडाउन गरेको चौथो दिनसम्म नगरवासीले खाद्य सामग्री, ग्याँसलगायत अत्यावश्यक वस्तु नपाउँदा भान्सा नै बन्द गर्नुपर्ने भयो भन्दै फोनबाट गुनासो गरेपछि आगामी चैत्र १५ गतेदेखि नगरपालिकाले यो सेवा दिन लागेको नगर प्रमुख सन्तोष चालिसेले राससलाई जानकारी दिएका छन् ।
“पाँच÷सात जनाको समूह बनाएर अभाव हुनेको घरमा आवश्यक सामान ढुवानीको व्यवस्था मिलाउन लागेका छौँ, उपभोक्ताले बजारकै भाउमा घरमै सामान पाउँछन्, ढुवानी खर्च नगरपालिकाले बेहोर्छ, यसरी सामान ढुवानी गर्नेको फोन नम्बरसमेत सार्वजनिक गर्छौँ” उनले भने ।
यसरी आउने सामानमा उपभोक्ताले अधिकतम मूल्यभन्दा बढी तिर्नुनपर्ने जानकारी पनि नगर प्रमुख चालिसेले दिएका छन् । सातादिनका लागि घोषणा गरिएको लकडाउनको चौथो दिनसम्म राजधानीकै काँठक्षेत्रका अधिकांश पसल खुलेका छैनन् । लकडाउनको पहिलो दिन चैत्र ११ गते केही पसल खुले पनि प्रहरीले नै बन्द गर्न लगाएको कागेश्वरी–मनोहरा नगरपालिकाका ज्ञानप्रसाद सिम्खडाले बताए । सरकारले अत्यावश्यक सेवाका खाद्य सामग्रीका पसलमा भीडभाड नगरी सेवा दिने भनी सूचना जारी गरे पनि प्रहरीले सही रूपमा नबुझेजस्तो देखिएको उनको दुखेसो छ ।
महानगरीय प्रहरीवृत्त बौद्धका प्रहरी प्रमुख प्रहरी नायब उपरीक्षक नवीन कार्कीले ग्याँस, पानीलगायत सामग्री राखिएका पसल बन्द गराउने नीति सरकारको नरहेकाले कतै त्यस्तो भएको भए खुलाउन लगाउने बताए ।
कोरोनाको सङ्क्रमणबाट बच्न सुरु गरिएको लकडाउनको मौका छोपी २० रुपियाँ पर्ने नुनको प्याकेटको २५ रुपियाँ लिएको, ग्याँसको कालोबजारी भएको, अत्यावश्यक चिनी, तेल, जारको पानीजस्ता सामग्रीको भाउ बढाइएको, ग्याँस राखेर नदिने गरिएको उपभोक्ता रजनी पुडासैनीको गुनासो छ ।
कृत्रिम अभाव, कालोबजारी र दोब्बरसम्म मूल्यवृद्धि हुँदा स्थानीय तहका अनुगमन समिति मुकदर्शक मात्र बनेको आम उपभोक्ताको भनाइ छ । स्थानीय तह सञ्चालन ऐनअनुसार नगरपालिकाका उपप्रमुखको संयोजकत्वमा अनुगमन समिति गठन हुने व्यवस्था छ । सङ्कटका बेला पनि यस क्षेत्रका बुढानीलकण्ठ, गोकर्णेश्वर, कागेश्वरी–मनोहरा, शङ्खरापुरलगायत नगरपालिकाका अनुगमन समिति निष्क्रिय रहेको स्थानीयवासीको गुनासो छ ।
