काठमाडौं । १० वर्षअघि एक महिलाको हत्या गरी फरार रहेका एक व्यक्तिसहित तीन जनालाई प्रहरीले पक्राउ गरेको छ।
पक्राउ पर्नेमा कर्तब्य ज्यान मुद्दाका दोषी सिन्धुपाल्चोकको साविक ठूलोपाखर गाविस ३ बस्ने वर्ष ४२ को काले वाङगेल भन्ने निमा लामा तथा बैंकिङ कसुर मुद्दामा सजाय पाएका पर्वतको कुश्मा नगरपालिका १० स्थायी वतन भई हाल सुन व्यवसाय गरी बस्ने सरोज खाती र स्याङ्जाको आधिखोला गाउँपालिका ३ घर भई हाल काठमाडौ चक्रपथस्थित सूर्य चन्द्र ज्वेलरी सेन्टर सञ्चालन गरी बस्ने वर्ष ६१ को भीम बहादुर विश्वकर्मा रहेका छन्।
उनीहरुमध्ये निमा लामा कर्तब्यज्यान र थुनुवा कैदी भागे भगाएको अभियोगमा २९ वर्ष ६ महिना २० दिन कैद सजाय तोकिएको थियो।
यस्तै, सरोज खाती बैंकिङ् कसूर मुद्दामा १० दिन कैद र रू २० लाख रुपैयाँ जरिवाना तोकिएका व्यक्ति हुन् भने भीम बहादुर विश्वकर्मा बैंकिङ् कसूर मुद्दामा २३ दिन कैद र ८० लाख रुपैयाँ सजाय पाएका व्यक्ति हुन्।
उनीहरु तीनै जनालाई नेपाल प्रहरी प्रधान कार्यालय केन्द्रीय अनुसन्धान ब्यूरोको टोलीले कास्कीका विभिन्न स्थानबाट पक्राउ गरेको हो।
प्रहरीका अनुसार २०७१ वैशाख २८ गते राति सिन्धुपाल्चोक ठूलोपाखर गाविस २ बस्ने वर्ष ४३ की कालीमाया लामालाई काले वाङगेल भन्ने निमा लामा सहितका ब्यक्तिहरूले कुटपिट गरी पटुकाले घाटी कसी चिलाउनेको रूखमा झुण्डयाएका थिए।
कर्तब्यज्यान मुद्दामा सिन्धुपाल्चोक जिल्ला अदालतको मिति २०७१ चैत १७ गतेको फैसलाले निमा लामालाई २० वर्ष कैद सजाय हुने ठहर भएकोमा उक्त सजाय कार्यान्वयनको क्रममा कारागार कार्यालय सिन्धुपाल्चोकमा रहेका उनी २०७२ साल वैसाख १२ गतेको भूकम्पपछि भत्किएको कारागारबाट भागी, अन्य थुनुवा कैदीलाई समेत भगाई फरार रहेका थिए।
उनलाई साइबर ब्यूरो कार्यालयबाट खटिएको प्रहरी टोलीले पुस ३ गते कास्की जिल्लाको विजयपुरबाट पक्राउ गरेको हो। लामाविरुद्ध फैसला कार्यान्वयनका लागि काठमाडौं जिल्ला अदालतमा पेश गरिएको छ।
यस्तै, सिन्धुपाल्चोक जिल्ला अदालतले थुनुवा कैदी भागे भगाएको मुद्दामा २०७४ फागुन ९ मा फैसला गर्दै लामालाई थप ९ वर्ष ६ महिना २० दिन कैद हुने समेत ठहर गरेको प्रहरीले जनाएको छ।
साथै, फैसला कार्यान्वयनका लागि फरार प्रतिवादीहरू खोजतलास गर्ने क्रममा बैंकिङ कसूर मुद्दामा कैद तथा जरिवाना वेरुजू रही फरार रहेका थप दुई जना पनि कास्कीबाट पक्राउ परेका हुन्।
उनीहरुलाई पनि काठमाडौं जिल्ला अदालतमा पेश गरिएको छ।
