महेन्द्रनगर । कोरोना संक्रमण विरुद्ध लड्न कञ्चनपुरको एक सामुदायिक वनले क्वारेन्टिन निर्माण गरेको छ । बेदकोट नगरपालिका–७ गाउजीस्थित अमर सामुदायिक वनले क्वारेन्टिन निर्माण गरेको हो ।
बेदकोट नगरपालिकाका प्रमुख अशोक कुमार चन्दले क्वारेन्टिनको उद्घाटन गर्दै सामुदायिक वनको सो कार्यले अरुहरुलाई पनि प्रेरणा मिल्ने बताउनुभयो । मेयर चन्दले अझ धेरै क्वारेन्टिनको आवश्यकता पर्ने औंल्याउँदै सरकोकार वाला सबैलाई यसबारे ध्यान दिन आग्रह गर्नुभयो ।
सो सामुदायिक वनका कोषाध्यक्ष महेश राज जोशीले भारतबाट सयौं नागरिक स्वदेश भित्रिरहेको अवस्थामा कोरोना संक्रमण पनि भित्रिएको हुन सक्ने भन्दै सम्भावित संक्रमित व्यक्तिलाई वन समितिले क्वारेन्टिनमा राख्ने व्यवस्था गरेको बताउनुभयो । कोरोना संक्रमण नफैलियोस् भन्नका लागि उनीहरुको प्रभावकारी स्वास्थ्य परीक्षण गर्न जोशीले आग्रह गर्नुभयो ।
अमर सामुदायिक वनका अध्यक्ष मोहन बहादुर चन्दले विपदका बेला सामुदायिक वनले सक्दो सहयोग गर्ने बताउनुभयो ।
