कृष्ण केसी, भरतपुर ।
चितवनमा राष्ट्रिय जनमोर्चा र रक्तिम सांस्कृतिक अभियानद्वारा सञ्चालित २०८० साल को प्रगतिशील देउसीभैलो समापन समीक्षा एवम् सम्मान कार्यक्रम सम्पन्न भएको छ ।
राजमो केन्द्रीय सदस्य तथा चितवन जिल्ला इन्चार्ज डम्मर पुरीको प्रमुख आतिथ्यमा २०८० मङ्सिर ९ गते शनिबार उक्त कार्यक्रम सम्पन्न भएको हो ।
राजमो चितवनकी उपाध्यक्ष देवी शर्माको अध्यक्षतामा अघि बढेको उक्त कार्यक्रममा राजमोको अर्का केन्द्रीय सदस्य राजेन्द्र ढुङ्गाना, अखिल नेपाल ट्रेड युनियन महासङ्घ (अन्टुक) का केन्द्रीय सदस्य डम्मर केसी, अन्टुककै चितवन जिल्ला उपाध्यक्ष जितबहादुर थापा, अखिल नेपाल महिला सङ्घकी केन्द्रीय सदस्य एवम् चितवन जिल्ला अध्यक्ष बालकुमारी आचार्य, अखिल (छैठौं) का चितवन जिल्ला उपाध्यक्ष दुर्गा भण्डारी र मूल प्रवाह अखिल भारत नेपाली एकता समाज दक्षिण भारत क्षेत्रीय समितिका सदस्य डिल्लिप्रसाद शर्माको आतिथ्य रहेको थियो ।
राजमो जिल्ला सचिव पदमप्रसाद वाग्लेको सञ्चालनमा अघि बढेको उक्त कार्यक्रममा रक्तिमका केन्द्रीय उपाध्यक्ष तथा चितवन जिल्ला अध्यक्ष मोहराज चालिसेले स्वागत गर्नुभएको थियो ।
कार्यक्रममा अतिथि र कलाकार कृति थापाले समग्र भैलो कार्यक्रमको समीक्षा, अनुभूतिका साथै सुझाव राख्नुभएको थियो ।
भैलोमा भूमिका खेल्ने विभिन्न कलाकारलाई कार्यक्रममा प्रशंसापत्र वितरण गर्नुभएको थियो ।
