काठमाडौं । गैरआवासीय नेपाल संघको विद्रोही पक्षले संघका सबै खाता रोक्का राख्न निवेदन दिएको छ । समानान्तर समिति गठन गरेको राजेन्द्र कुमार शर्मा (आरके) समूहले बैंक खाता रोक्का गर्न निवेदन दिएको हो ।
शर्मा समूहले बैंकका प्रमुख कार्यकारी अधिकृतलाई भेटेर खाता रोक्का गर्न निवेदन दिएको जनाएको छ ।
११ औं अधिवेशनमा धाँधली भएको भन्दै आरके समूहले बेग्लै समिति गठन गरेको थियो । अनलाइनबाट भएको मतदानमा डा। बद्री केसीको समूह विजयी भएपछि विवाद बढेको हो ।
अध्यक्षका प्रतिस्पर्धी राजेन्द्र कुमार शर्मा र महेश कुमार श्रेष्ठले धाँधली भएको आरोप लगाउँदै पुन: निर्वाचनको माग गरिरहेका छन्।
गैरआवासीय नेपाली संघको १५–१६ वटा बैंकमा खाता भएपनि मुख्यत ३–४ वटाबाट बढी कारोबार हुने गरेको छ। आरके समूहका महासचिव बुद्धिसागर सुवेदीका अनुसार सानिमा बैंक, ग्लोबल आईएमई बैंक, प्रभु बैंकमा बढी रकम रहेको छ।
