काठमाडौं । गैर आवासीय नेपाली संघको ११ औँ अधिवेशनमा नयाँ नेतृत्व छान्न अनलाइन मतदान हुने भएको छ । ४ दिनसम्म चल्ने अधिवेशन मंगलबार राष्ट्रपति रामचन्द्र पौडेलले उद्घाटन र प्रधानमन्त्री पुष्पकमल दाहालले समापन गर्ने कार्यक्रम छ।
अधिवेशनको नयाँ नेतृत्व अनलाइनबाट समेत मतदान गरी चुनिने भएको हो। संघको निर्वाचन ‘फेसियल भेरिफिकेसन’को आधारमा हुने संघले जनाएको छ ।
निर्वाचनमा ५९ देशका ४ हजार २२७ प्रतिनिधि सहभागी हुँदै छन्। ८६ देशमा एनआरएनए विस्तार भैसकेकोमा ५९ देशमा अधिवेशन भएको थियो। जसमध्ये ११ देशमा अनलाइन भेरिफिकेसनको आधारमा निर्वाचन भएको थियो।
एनआरएनएका प्रवक्ता सोम सापकोटाले संसारको जुनसुकै स्थानमा बसेर सजिलै मतदानमा भाग लिन सकिने व्यवस्था गरिएको बताए।
संघ स्थापना २० वर्षमा नागरिता दिने व्यवस्था, सेयरमा लगानी गर्न सक्ने कानुनी व्यवस्था भैसकेको बताउँदै विदेशमा बस्ने नेपालीलाई मतदानको कानुन निर्माणको चरण भएको बताए।
गैर आवासीय नेपाली संघको नयाँ नेतृत्वका लागि ४ जनाको उम्मेदवारी परेको छ। ११ औं महाधिवेशनमा हालका अध्यक्षसहित उपाध्यक्ष प्रतिस्पर्धा गर्न लागेका हुन्।
संघको निर्वाचन समिति अनुसार अध्यक्षमा डा. बद्री केसी, महेशकुमार श्रेष्ठ, राजेन्द्रकुमार शर्मा, रविना थापाले उम्मेदवारी दर्ता गरेका छन्। मंगलबार काठमाडौंमा महाधिशेन शुरू हुँदै छ।
केसी कार्यकारी अध्यक्ष रहेका छन् भने थापा ३ अध्यक्ष मध्ये एक हुन्। श्रेष्ठ र शर्मा एनआरएनए उपाध्यक्ष रहेका छन्।
निर्वाचनमा अध्यक्ष, महिला र युवा उपाध्यक्ष सहित ८ जना, महासचिव १ जना, उपमहासचिव २ जना, महिला सहित ७ जना सचिव, १ कोषाध्यक्ष र १ महिला कोषाध्यक्षसहित ४ जना सहकोषाध्यक्ष, महिला सहसंयोजक १, युवा संयोजक १ जना प्रतिस्पर्धा गर्दै छन्।
त्यसैगरी, क्षेत्री संयोजक ६ जना, क्षेत्रिय उपसंयोजक १७ जना, क्षेत्रीय महिला संयोजक ६ जना, क्षेत्रीय महिला उप संयोजक ६, क्षेत्रीय युवा संयोजक ६ जना, क्षेत्रीय युवा उप संयोजक ६ जना र देस्रो पुस्ताका गैर आवासीय नेपाल संयोजक १ जना रहने छन्।
