भरतपुर । भरतपुरका दुई अस्पतालमा मात्रै स्वास्थ्य बिमाको सेवा हुँदा बिरामीले अस्पतालमा शैया (बेड) पाउन छाडेका छन् । दुई अस्पताका शैया भरिभराउ भएपछि भर्ना पाउन छाडेका हुन् ।
यहाँको सरकारी भरतपुर अस्पताल र निजी स्तरको कलेज अफ मेडिकल साइन्सेसमा मात्रै स्वास्थ्य बिमामार्फत उपचार सुविधा छ । यी दुई अस्पतालमा बिरामामीको चाप बढेपछि आकस्मिक (इमर्जेन्सी) र बहिरङ्गमा समेत बिरामीले भरिने गरेका छन् । चितवन मेडिकल कलेजसहित निजी अस्पतालमा भने बिरामीको चाप कम छ ।
भरतपुर अस्पतालका प्रमुख मेडिकल सुपरिटेन्डेन्ट प्रा डा कृष्णप्रसाद पौडेलले अस्पताल आएका बिरामीलाई भर्ना गर्न नसकेर फिर्ता गर्नुपरेको बताउनुभयो ।
उहाँले भन्नुभयो– ‘हामीकहाँ आएका सेवाग्राहीलाई शैया छैन भनेर भनिरहनुपर्दा अत्यन्त दुखित छौँ ।’
गत केही दिनदेखि आकस्मिकदेखि सबै छ सय शैया प्राय: खाली नभएको उहाँले बताउनुभयो । अस्पतालमा सघन उपचार कक्ष ३०, बाल सघन उपचार कक्ष छ, नवजात शिशु सघन उपचार कक्ष २० सबै भरिएका छन् ।
त्यस्तै, १० शैयाको वृद्धवृद्धा वार्डको शैया शुक्रबारदेखि बढाएर १६ पुर्याइएको छ । ती शैयामा पनि बिरामीको चाप छ । स्वास्थ्य बिमाका कारण बिरामी भरिएका हुन् ।
पौडेल भन्नुभयो– ‘सङ्घीय अस्पतालमा ७० प्रतिशत चितवनका र बाँकी बाहिरी जिल्लाका बिरामी आउने गरेका छन् । त्यसमध्ये बिमाका बिरामी ७० प्रतिशतभन्दा बढी छन् । दैनिक बहिरङ्ग सेवामा दुई हजारभन्दा बढी बिरामी आउने गरेको छन् ।’
त्यस्तै, अस्पतालका स्वास्थ्य बिमा कार्यक्रम इन्चार्ज लीलाधर पौडेल दैनिक ४० जनाभन्दा बढी बिमाका बिरामी रिफर लिएर जाने गरेको बताउनुहुन्छ ।
शिक्षण अस्पतालमा पाँच सय ५० शैया सञ्चालनमा छन् । तीमध्ये ९० ओटा सघन उपचार कक्ष छन् । नवजात शिशुदेखि वृद्धवृद्धासम्मलाई उपचार गर्नका लागि सघन उपचार कक्ष अस्पतालमा छन् । ती सबै भरिएको उहाँले बताउनुभयो ।
मौसम परिवर्तनसँग मौसम ज्वरो, डेङ्गु, स्क्रबटाइफस लगायतका बिरामीको सङ्ख्या बढेको छ । पूर्वपश्चिम राजमार्ग, पृथ्वी राजमार्गलगायत भित्री सडकमा हुने दुर्घटनाका बिरामी पनि यहाँ अस्पतालमा आउने गर्दछन् । यहाँका अस्पतालमा चितवनसहित देशैभरबाट बिरामी आउने गर्दछन् । नजिकका जिल्लाबाट स्वास्थ्य बिमा गर्दा नै पहिलो विन्दु भरतपुर अस्पताल बनाउनेको सङ््रख्यासमेत ठुलो छ । (रासस)
