काठमाडौँ । जिल्ला प्रहरी परिसर काठमाडौँले बैदेसिक रोजगारीमा पठाइदिन्छु भनेर ठगी हुने क्रम बढ्दै गएको भन्दै सचेत रहन आग्रह गरेको छ ।
२०८० भदौ ७ गते बिहीबार पत्रकार सम्मेलन गर्दै जिल्ला प्रहरी परिसर काठमाडौँले यस बारेमा नागरिकहरू सचेत हुनुपर्ने बताएको हो ।
पत्रकार सम्मेलनमा बोल्दै जिल्ला प्रहरी परिसर काठमाडौँका प्रहरी वरिष्ठ उपरीक्षक दानबहादुर कार्कीले पार्सल तथा डलर पठाई करबापतको रकम जम्मा गर्न लगाइ ठगी गर्ने क्रम पनि बढेको बताए ।
उनले सबैभन्दा धेरै उजुरी र निवेदन बैदेसिक रोजगारीमा पठाइदिन्छु भनेर ठगि गरिएको बताए । उनले बैङ्क खातामा अनधीकृत पहुँच पुर्र्याई रकम ठगी गर्ने क्रम बढेको भन्दै सचेत गराए ।
यस्तो थियो उनको भनाइ :
‘गत वर्षको माघदेखि यस वर्षको असारको मसान्तसम्म हामीले ८ हजार ९२३ ओटा मुद्दा दर्ता गरेका रहेछौँ । एक नम्बरमा बैङ्किङ कसुर, अभद्र व्यवहार, यस्ता मुद्दामा ५ हजार ९४० जना हामीले पक्राउ गरेर कानुनी दायरामा ल्याइसकेको अवस्था छ । साइबर शाखातिरबाट हेर्ने हो भने ३३२ ओटा निवेदन प्राप्त भएका रहेछन् । रकमतर्फ हामीले हेर्ने हो भने पाँच करोड ४१ लाखभन्दा बढीको रकम तलमाथि भएको रहेछ । यसभित्र पार्सल तथा डलर पठाई करबापतको रकम जम्मा गर्न लगाई ठगी गरेको, बैदेसिक रोजगारीमा पठाइदिन्छु भनेर सबैभन्दा धेरै समस्या अहिले एक त यसै बेरोजगार छन् । बेरोजगार भएको अवस्थामा बैदेसिक रोजगारमा पठाउँछु भनेर ठगी गर्नेको सङ्ख्या पनि ठुलो छ । बैङ्क खातामा अनधीकृत पहुँच पुर्याई रकम ठगी गर्ने क्रम बढेको छ ।’
