देवनाथ योगी (डोटी)
करिब दुई वर्षअघि सुदूरपश्चिममा राष्ट्रिय जनमोर्चाबाट एउटा समूह माओवादीमा सामेल भयो । उनीहरुमध्ये केहीले हाम्रो पार्टी राष्ट्रिय जनमोर्चालाई गालीगलौज गर्ने, साथीहरुका बीचमा भ्रम पार्ने, भड्काउन गर्न थाले । हाम्रा सोझा सिधा साथीहरु पनि भड्काउमा लागे ।
म त पछिसम्म पनि राजमोमै थिएँ । तर, संसदको चुनाव आसपास (२०७९ मंसिरतिर) मेरै गाउँका केही साथीहरु पनि माओवादीमा लागे । भाइ (केशवनाथ योगी) को कारण म पनि माओवादी भएँ । माओवादीमा जानासाथ उनीहरुले मलाई प्रदेश कमिटीको सदस्य बनाए ।
हाम्रो राष्ट्रिय जनमोर्चामा देश र जनताको कुरा हुन्छ । नीति, सिद्धान्तको कुरा हुन्छ । साथीहरुबीच संघर्षको विषयमा बहस छलफल हुन्छ । तर, माओवादीमा देश र जनताको कुरा हुँदो रहेनछ । पद र फाइदाको मात्रै कुरा हुँदो रहेछ । यो देखेर चित्त बुझेन ।
माओवादीमा उकुस मुकुस भयो । कसरी आफ्नै पार्टीमा फर्कौं भन्ने लाग्यो । तर, को सँग कुरा गर्ने ? पार्टी छोडेर गएको मान्छे कुरा गर्न पनि असहज लाग्यो । तैपनि मैले कैलालीका पूर्णबहादुर शाहीजीलाई फोन गरेँ । मेरो गल्ती भयो । आत्मआलोचना गर्छु । माओवादी छोडेर आफ्नै पार्टीमा फर्कन्छु भनेँ । उहाँले हुन्छ, म मनोजजी (मनोज भट्ट) सँग कुरा गर्छु भन्नुभयो ।
पछि मनोजजीको फोन आयो । मैले उहाँसँग पनि त्यही कुरा राखेँ । मनोजजीले तपाइँप्रति हाम्रो कुनै आग्रह पूर्वाग्रह छैन । फर्कनुस् स्वागत छ भन्नुभयो ।
अस्ति २७ गते राजमो डोटीको मिटिङ थियो । मलाई साथीहरुले बोलाउनुभयो । साथीहरुका अगाडि मैले फेरि आत्माआलोचना गरेँ । सबै साथीले मलाई स्वागत गर्नुभयो । म एकदमै खुशी छु ।
हाम्रो पार्टी छोडेर माओवादीमा जाने साथीहरु धेरैजसो दुःखी छन् । अगुवा बनेका २/४ जनाले फाइदा लिएका छन् । ती बाहेक माओवादीमा गएकाहरु अपमानित छ । साथीहरु उपयुक्त अवस्थामा फर्कन तयार हुनुहुन्छ । कैयौं साथीहरुसँग मेरो कुराकानी भैराखेको छ ।
हाम्रो पार्टीलाई गालीगलौज गर्ने, पार्टीलाई ध्वस्त पार्न हिँडेकाहरुलाई त हामीले फर्काउन पनि हुन्न । तर, इमान्दार र भ्रमबस पार्टी छोडेका साथीहरुसँग कुराकानी गरेर फर्काउनुपर्छ । केही साथीहरु तयार पनि भइसक्नुभएको छ । माओवादीमा अपमानित भएर बस्नभन्दा आफ्नै प्यारो घर राष्ट्रिय जनमोर्चामा फर्कन म साथीहरुसँग आग्रह गर्छु ।
(हालै माओवादीबाट राष्ट्रिय जनमोर्चामा फर्किएका देवनाथ योगीसँग गरेको कुराकानीमा आधारित ।)
